Arrihet marrëveshja ndërmjet Vietnamit dhe Selisë së Shenjtë
R.SH. - Vatikan
Më 19 dhjetor, u zhvillua në Hanoi, Takimi i shtatë i Grupit të Përbashkët të Punës ndërmjet Vietnamit dhe Selisë së Shenjtë, kryesuar bashkarisht nga Zëvendësministri i Punëve të Jashtme, kreu i Delegacionit të Vietnamit, Bui Thanh Son dhe nga imzot Antoine Camilleri, Zv.Sekretar i Vatikanit për Marrëdhëniet me Shtetet, kreu i Delegacionit të Selisë së Shenjtë. Takimi u mbajt në një atmosferë miqësore e respekti. Njoftimin e jep Zyra e Shtypit të Vatikanit.
Zhvillime pozitive në marrëdhëniet dypalëshe
Të dyja palët folën gjerësisht mbi marrëdhëniet Vietnam-Seli e Shenjtë, duke përfshirë çështjet, që kanë të bëjnë me Kishën Katolike në Vietnam. Delegacionet pranuan zhvillimet e fundit pozitive të marrëdhënieve, sidomos, përsa u përket kontakteve dhe konsultimeve në të gjitha nivelet, përfshirë takimet e nivelit të lartë. Tani, këto marrëdhënie duhet të vazhdojnë mbi bazën e parimeve të përbashkëta dhe të dialogut të frytshëm, në interes të bashkësisë katolike në Vietnam.
Marrëveshje për përfaqësimin e përhershëm papnor
Palët diskutuan e vendosën që të rritet niveli i marrëdhënieve ndërmjet dy shteteve, prandaj, Selia e Shenjtë do të dërgojë një përfaqësues papnor të përhershëm, në vend të atij të përkohshëm, siç e kërkonte niveli i deritanishëm diplomatik. Nga ana vietnameze, u theksua se partia e shteti – kujtojmë se Vietnami është nën komunizëm – po bëjnë hapa drejt përmirësimit të kuadrit politik për të respektuar e garantuar lirinë e fesë e të besimit. Gjithashtu, e inkurajojnë dhe i krijojnë lehtësime bashkësisë katolike për të vepruar në vend, sipas ligjeve vietnameze. Çështje të tjera, që u diskutuan gjatë takimit të shtatë dypalësh, kanë të bëjnë me ndarjen në dioqeza dhe me emërimet e ipeshkvijve.
