Takimi Botëror i Familjeve: ”Të ndihmohen çiftet për ta jetuar martesën si thirrje”.

R. SH. - Vatikan

“Të ndihmohen çiftet për ta jetuar qysh në fillim martesën si thirrje, që duhet të vijojë gjithë jetën, sepse familja është bashkësia ku besnikëria e Zotit mund të shfaqet me gjithë fuqinë e saj e ku edhe ne mund të jemi besnikë të Zotit”. E theksoi këtë, Gabriella Gambino, zëvendës-sekretare e Dikasterit të Selisë së Shenjtë për Laikët, Familjen e Jetën,  duke drejtuar takimin kushtuar Kapitullit VI të “Amoris laetitia”, në të cilin ftohen bashkëshortët e krishterë ta vijojnë “vallen e të dashuruarit”.   

Për të jetuar “në këtë lartësi” - nënvizoi - është i nevojshëm edhe bashkëpunimi me Kishën: “Nëse barinjtë duhet ta dëshmojnë besimin e tyre në Sakramentin e Martesës, bashkëshortë e barinj, së bashku, duhet të jenë të vetëdijshëm e plot përgjegjësi për të mirën e Kishës, parë si bashkim i familjeve”.

Gambino vuri, më pas, në dukje edhe mbi çfarë “shkëmbi” duhet ndërtuar  “akti i besimit në pazgjidhshmërinë e martesave”: “Kemi nevojë për mbështetje, që të mund ta jetojmë me shpresë jetën tonë bashkëshortore. Duhet të shikojmë gjithnjë drejt së ardhmes, jo mendjelehtësisht, jo cektësisht, por me atë energji e me atë forcë, që burojnë nga vetëdija se jemi bashkuar në Zotin e nga Zoti për gjithë jetën, në mënyrë që të lëmë një shenjë shprese në këtë botë”.