Medjugorje, Papa emëron Hoser vizitator të përhershëm
R. SH. - Vatikan
Akoma asgjë e re lidhur me dukjet mariane në Medjugorje, që përsëriten prej dhjetra vitesh; ndërsa Papa merr një vendim, që flet vetë për vëmendjen e madhe me të cilën i ndjek këto dukje, por pa i përcaktuar si të mbinatyrshme. Vendimi ka të bëjë me shoqërimin e besimtarëve të panumërt, që vijojnë të arrijnë në Medjugore nga të katër anët e botës.
Papa Bergoglio, më datën 31 maj 2018, emëroi imzot Henryk Hoser, kryeipeshkëv nderi i Varshavë-Pragës, në Poloni, si “vizitator apostolik me karakter të posaçëm për famullinë e Medjugorjes, me kohë të papërcaktuar dhe ad nutum Sanctae Sedis” - domethënë në dispozicion të Selisë së Shenjtë.
“Bëhet fjalë - njofton një komunikatë e Sallës së Shtypit të Vatikanit - për një detyrë baritore, në vazhdimësi me misionin e të dërguarit të posaçëm të Selisë së Shenjtë për famullinë e Medjugorjes, besuar imzot Hoser më 11 shkurt 2017 e përfunduar nga ai muajt e kaluar”.
“Misioni i vizitatorit apostolik - përfundon komunikata - ka për qëllim t’i sigurojë shoqërim të vazhdueshëm bashkësisë famullitare të Medjugorjes dhe besimtarëve, që shtegtojnë në shenjtërore, kërkesat e të cilëve duhen trajtuar me vëmendje të posaçme”.
Drejtori i Sallës vatikanase të Shtypit, Greg Burke, nënvizon “karakterin baritor, jo doktrinor” të misionit të Hoser, duke sqaruar se “vendimi i sotëm nuk hyn në çështje doktrinore, që lidhen me vërtetësinë e dukjeve mariane në Medjugorje”. Emërimi, prandaj, nuk ka të bëjë me përfundimin e çështjes së Medjugorjes, por është një hap i ri i misionit të vetë Hoser. Prelati do ta ketë selinë në Medjugore, për të bashkëpunuar më nga afër me ipeshkvin dhe françeskanët vendas.
Më 2 qershor Heparkia e Ungros do të kremtojë ditën e rinisë. Do të marrin pjesë më se 500 të rinj, që do të kenë mundësi të bisedojnë e të ballafaqohen.