Papa: La Civiltà Cattolica, më shumë se revistë, është përvojë shpirtërore
R. SH. - Vatikan
Urimet e mia edicionit spanjisht të revistës “La Civiltà Cattolica” që po rifillon botimet - shkruan Papa. Revista juaj është e pashoqe në llojin e vet, e jo vetëm pse mbushi 170- vjet jete. Më shumë se revistë, është përvojë e vërtetë shpirtërore, komunitare e intelektuale, e cila përqendrohet mbi një bashkësi jezuitësh, mbi Kolegjin e shkrimtarëve, që bashkëjeton e shqyrton, zgjidh e përpunon temat, që duhen trajtuar.
Me botimin në gjuhën italiane, angleze, frënge, ruse, kineze, koreane e japoneze, ju arrini tek një publik i gjerë. E, duke folur edhe spanjisht tani, revista e zgjeron numrin e lexuesve dhe hap sfida të reja. Keni para jush lexuesit e 21 vendeve të gjuhës spanjolle!
Ndaj ju ftoj: vozitni! Me pasion e vendosmëri në barkën e Pjetrit, si jezuitë të mirë! Vozitni me penën tuaj, duke dialoguar me të gjithë, duke synuar të dilni në det të hapur!
Këkojeni Zotin, aty ku gjindet, posaçërisht tek ata, që kanë etje e uri për të vërtetën, e cila gjen shprehjen e vet në veprat e dashurisë e të mëshirës.
Kërkoni në fusha të ndryshme të reflektimit filozofik e teologjik të Popujve të Spanjës, Amerikës Latine, Karaibeve, gërmoni në kulturat e tyre, në shkencën e tyre, në artin e angazhimin shoqëror e politik.
Posaçërisht në këto kohë krize, me reflektimin tuaj, ju vini në shërbim të mbarë njerëzimit Ungjllin e Mbretërisë së Zotit, si gurrë shëlbimi për kohën tonë!”.