Papa për Sirinë: bota ta ndihmojë vendosmërisht që t’i japë fund krizës
R. SH. - Vatikan
Një thirrje e fuqishme, drejtuar “palëve në konflikt” në Siri, që të japin shenja vullnetmira për të hapur, kështu, shtegun e shpresës për popullsinë e dërmuar nga lufta”. Por edhe urimi për angazhim të vendosur konstruktiv e solidar nga ana e bashkësisë ndërkombëtare, në mënyrë që “të ulen armët e të mund të rikrijohet indi shoqëror, të rifillojë rindërtimi dhe ripërtritja ekonomike”.
Një nga katastrofat humanitare më të rënda të kohës sonë
Kjo, ndërhyrja e Papës, pas lutjes së Engjëllit, në prag të dhjetëvjetorit të fillimit të “konfliktit gjakatar në Siri, që shkaktoi një nga katastrofat më të rënda humanitare të kohës sonë". Papa kujtoi vuajtjet e Sirisë “së dashur e të martrizuar”:
“Një numër i papërcaktuar të vdekurish e të plagosurish, miliona refugjatë, mijëra të zhdukur, shkatërrime, dhunë e të gjitha natyrave e vuajtje mbinjerëzore për mbarë popullsinë, posaçërisht për më të ligshtit, si fëmijët, gratë, pleqtë”.
Këtë kuadër rrënqethës pikturoi Papa, për t’u kërkuar, më pas, të gjithëve ta lusin Zotin “që e tërë kjo vuajtje e Sirisë së dashur, të mos harrohet e që solidariteti të ngjallë shpresat, që duken të humbura!”.
E menjëherë pas, Papa i ftoi besimtarët e mbledhur në Sheshin e Shën Pjetrit të thonë së bashku një “Falemi Mari”
Thirrja e fundit, nga Iraku, në takimin ndërfetar të Urit
Siria po e jeton dhjetëvjetorin e fillimit të konfliktit, që shpërtheu më 15 mars të vitit 2011, me një bilanc tejet të rëndë: më se 400 mijë viktima, 12 milionë të shpërngulur e 12,4 milionë të tjerë, 60% e popullsisë, tronditur thellë nga pasiguria ushqimore. Papa, një javë më parë, në Irak, gjatë takimit në Rrafshin e Ur, i ftoi përfaqësuesit e të gjitha feve të kërkojnë në lutje që Lindja e Mesme, e posaçërisht “Siria e martirizuar”, të kalojë nga konflikti - në unitet, duke ecur në rrugën e paqes.
