Papa lutet për Mianmarin, duke kërkuar drejtësi e stabilitet
R. SH. - Vatikan
Në përfundim të Engjëllit të Tënzot, Papa shprehu gjithë shqetësimin e tij për çastin tejet delikat, që po kalon Mianmari pas grushtit ushtarak të shtetit që, më 1 shkurt, çoi në arrestimin e prijëses, Nobel për Paqen, Aung Suu Kyi. Në këtë gjendje është sot Mianmari, që zë një vend të posaçëm në zemrën e Papës, që nga koha e vizitës së tij apostolike më 2017, e për të cilin i ftoi besimtarët në një lutje të heshtur.
Ditë ngarkuar me shqetësim
Këto ditë ndjek me shqetësim të thellë zhvillimet e situatës së krijuar në Myanmar - kujtoi Ati i Shenjtë - vend të cilin që nga vizita ime apostolike më 2017-tën, e kam në zemër me shumë dashuri:
“Në këtë çast kaq delikat, dëshiroj t’i siguroj përsëri afërsinë time shpirtërore, lutjen time e solidaritetin tim popullit të Mianmarit e lutem që të gjithë ata, të cilët kanë përgjegjësi në vend, të vihen me gatishmëri të sinqertë në shërbim të së mirës së përbashkët, duke promovuar drejtësinë shoqërore e stabilitetin kombëtar, për një bashkëjetesë të harmonishme demokratike”.
Në përfundim, ftesa e Papës drejtuar të gjithë besimtarëve:
“Të lutemi për Mianmarin!”.
E dielë lutjeje e agjërimi
Fjalët e Papës u shqiptuan në një ditë, kur Konferenca ipeshkvnore birmane(Cbcm) u bëri thirrje besimtarëve të agjërojnë e të luten për paqen. Ipeshkvijtë kërkuan ndjete e homeli, që bëjnë thirrje për dialog, për t’iu kundërvënë dhunës e për rikthimin e demokracisë, të cilën kardinali Charles Bo, kryetar i Konferencës ipeshkvnore, e kërkoi në thirrjen drejtuar popullit dhe institucioneve më 4 shkurtin e kaluar, duke theksuar se paqja dhe demokracia janë e vetmja rrugë në të cilin duhet ecur!
Kështu shprehet këto ditë edhe kardinali Vincent Nichols, kryetar i Konferencës ipeshkvnore të Anglisë dhe Uellsit(Cbcew) që, në një deklaratë të shkurtër bashkohet me lutjen për pajtim në Mianmar e për lirimin e gjithë të burgosurve politikë.
