Tek Françesku, Presidenti i turnit i Bosnjës dhe Hercegovinës
R. SH. - Vatikan
Papa Françesku priti sot në audiencë, në Pallatin Apostolik Vatikanas, Željko Komšić, President i turnit i presidencës kolegjiale të Bosnjës e Hercegovinës. Njoftimin e jep një komunikatë e Sallës vatikanase të Shtypit. Komšić më pas u takua edhe me kardinalin Pietro Parolin, sekretar i Shtetit, shoqëruar nga imzot Miroslaw Wachowski, zëvendës-sekretar për Marrëdhëniet me Shtetet.
Marrëdhëniet dypalëshe, realiteti i brendshëm
Gjatë bisedimeve në Sekretarinë e Shtetit, zhvilluar në një atmosferë të përzemërt, palët u ndaluan tek marrëdhëniet e mira dypalëshe dhe tek realiteti i brendshëm i vendit, me vëmendje të përqendruar mbi gjendjen e bashkësisë katolike.
Temat ndërkombëtare e rajonale
Së fundi u prekën edhe disa tema me interes të përbashkët në fushën ndërkombëtare e rajonale, si paqja e siguria, nevoja e favorizimit të udhëve të dialogut, për të përballuar sfidat e ndryshme të Ballkanit perëndimor dhe perspektivat e zgjerimit të Bashkimit Evropian në rajon.