Papa pranon dorëheqjen e komandantit Gianni: gjest, që e nderon
R.SH. - Vatikan
Domenico Giani, komandant i Trupit të Xhandarmërisë së Vatikanit, “ia dorëzoi mandatin e tij Atit të Shenjtë, në frymën e dashurisë dhe të besnikërisë ndaj Kishës dhe Pasardhësit të Shën Pjetrit”. Kjo lexohet në deklaratën e sotme të Sallës së Shtypit të Selisë së Shenjtë.
Giani e mori këtë vendim, thuhet në njoftimin për shtyp, “pavarësisht se nuk ka asnjë përgjegjësi subjektive lidhur me çështjen” e publikimit “të një Dispozite të rezervuar Shërbimi, nënshkruar nga komandanti i Trupit të Xhandarmërisë”, në disa organe shtypi, më 2 tetorin e kaluar. Kjo Dispozitë kishte të bënte me “pasojat e disa kufizimeve administrative për personelin e Selisë së Shenjtë”. Publikimi, nënvizohet në komunikatën vatikanase, “dëmtoi rëndë dinjitetin e personave të përfshirë në çështje dhe imazhin e Xhandarmërisë”.
Me dorëheqjen e tij, Giani synon të “garantojë qetësinë e duhur për vazhdimin e hetimeve të koordinuara nga Promotori i Drejtësisë dhe të zbatuara nga personeli i Trupit të Xhandarmërisë, meqenëse akoma nuk ka dalë autori material i nxjerrjes së Dispozitës së shërbimit jashtë” Vatikanit. Kujtojmë se bashkë me Dispozitën, janë publikuar edhe fotografitë e të hetuarve, por, në të vërtetë, ajo u drejtohet vetëm anëtarëve të Xhandarmërisë dhe të Rojes Papnore Zvicerane.
“Duke pranuar dorëheqjen - lexohet në komunikatë - Ati i Shenjtë foli për një kohë të gjatë me komandantin Giani dhe shprehu vlerësimin e tij për këtë gjest, duke theksuar se ai ishte shprehje lirie dhe ndjeshmërie institucionale, që e nderon personin dhe shërbimin e tij, kryer me përvujtëri dhe maturi për Ministerin Pjetrin dhe Selinë e Shenjtë. Papa Françesku deshi edhe të kujtonte besnikërinë e tij të padiskutueshme njëzet vjeçare dhe nënvizoi se, duke treguar në mënyrën më të mirë stilin e tij të dëshmisë në çdo anë të botës, komandanti Giani diti të krijojë dhe të garantojë përreth Papës një atmosferë të vazhdueshme natyrshmërie dhe sigurie”.
“Duke përshëndetur dr. Domenico Giani - përfundon deklarata - Ati i Shenjtë e falënderoi edhe për kompetencën e lartë, që ka treguar në vënien në jetë të shërbimeve të shumta e delikate në kuadrin ndërkombëtar, si edhe për nivelin e profesionalizmit të padiskutueshëm, ku e çoi Trupin e Xhandarmërisë”.
Të shtunën e kaluar, drejtori i Sallës së Shtypit të Vatikanit, Matteo Bruni, në një prononcim për agjencinë italiane të lajmeve Ansa, pati thënë se për Papën Françesku, “botimi i paligjshëm” i asaj Dispozite shërbimi “është i krahasueshëm me një mëkat mortar, pasi dëmton dinjitetin e personave dhe cënon parimin e supozimit të pafajësisë”.