Në pritje të Lojërave Olimpike, ku gjithë bota flet të njëjtën gjuhë

R. SH. - Vatikan

Numërohen orët, në pritje të ceremonisë, që do t’i përurojë Lojrat Olimpike të Tokios 2020. Zhvillohen një vit më vonë, pikërisht për shkak të pandemisë e cila, duke  frenuar çdo veprimtari, u bë shkaktare për këtë shtyrje. Me shpresë se do të mbaheshin në atmosferën e çlirimit të plotë nga frika e virusit. Po edhe në vitin 2021 virusi vijon të endet lirisht nëpër botë, e, për fat të keq, si të donte të marrë pjesë në Olimpiadë - bredh edhe në fshatin olimpik. Sportistë nga vende të ndryshme rezultojnë pozitivë e nuk do të mund të konkurojnë në gara. Po makina organizative shkon përpara…

Programi baritor modifikohet

Për shkak të pandemisë së Covid-19, kryedioqeza e Tokios  u detyrua ta shlyejë programin baritor, menduar për sportistët e Lojërave Olimpike. Por jo krejtësisht: dioqeza do të jetë e gatshme t’i plotësojë nevojat shpirtërore të sportistëve, do të kremtojë një Meshë ndërkombëtare e do t’u dhurojë të gjithë pjesëmarrësve, një rruzare të posaçme.

Po veprimtaritë e tjera u shlyen, nga frika se mund të ndikonin për përhapjen e virusit. Në një notë të veçantë, kryeipeshkvi i Tokios, imzot Tarçizio Isao Kikuchi, i fton sportistët të mos i vizitojnë kishat, duke nënvizuar përgjegjësinë e secilit  për jetën e vet e të tjetrit. Po kremtimet liturgjike nuk do të mungojnë. Do të transmetohen online. E nuk do të mungojë as optimizmi tipik i Kishës katolike. Nota e prelatit përfundon pikërisht me një sinjal optimizmi: “Në Tokio - shkruan - stina e shirave  përfundoi e pas tyre në qiell u duk ylberi, simbol shprese!”.