Një uebinar do të hapë kremtimet për 5-vjetorin e “Amoris Laetitia”
R.SH. - Vatikan
Një takim në internet do të hapë zyrtarisht kremtimet për 5-vjetorin e botimit të Nxitjes apostolike “Amoris Laetitia” të Papës Françesku. Uebinari do të mbahet më 19 mars, ditën e solemnitetit të Shën Jozefit, në të cilën do të fillojë Viti “Familja Amoris Laetitia”, që do të përfundojë më 26 qershor 2022, me rastin e Takimit X Botëror të Familjeve.
Pritet një mesazh i Papës
Uebinari me titull “Dashuria jonë e përditshme” - organizuar nga Dikasteri për Laikët, Familjen dhe Jetën, nga dioqeza e Romës dhe nga Instituti Teologjik Papnor Gjon Pali II për Martesën dhe Familjen - do të ndahet në dy takime të hapura për të gjithë: njëri më festiv, ku do të marrin pjesë, ndër të tjerë, edhe kardinali Kevin Joseph Farrel, prefekt i Dikastrit për Laikët, Familjen dhe Jetën e kardinali Angelo De Donatis, vikar i dioqezës së Romës; tjetri, më teologjik, me ekspertë dhe profesorë. Pritet një mesazh nga Papa Françesku.
Amoris Laetitia, farë e mbjellë në brazdën e Kishës
“Amoris Laetitia - shpjegon për Radio Vatikanin don Giovanni Cesare Pagazzi, profesor i eklesiologjisë dhe i bashkësisë familjare në Institutin Teologjik Papnor Gjon Pali II, një nga relatorët e uebinarit - është dokument i gjallë dhe i ndërlikuar, mbjellë në brazdën e historisë së Kishës dhe, si të gjitha farat, ka nevojë për kujdes e vëmendje. Viti kushtuar kësaj Nxitjeje apostolike u shpall nga Papa për të verifikuar efektin e këtij dokumenti në marrëdhëniet familjare”.
Osmozë ndërmjet teologjisë dhe baritorisë
Sipas don Pagazzi-t, organizimi i uebinarit është “përgjigje e denjë edhe ndaj një ftese, që ka bërë Papa në një dokument tjetër, ‘Veritatis Gaudium’, kushtetutë apostolike për universitetet dhe fakultetet kishtare, ku Ati i Shenjtë uron të krijohet një osmozë ndërmjet punës teologjike dhe asaj baritore. E ky takim është rezultat i bashkëpunimit ndërmjet tri organizatave tejet të ndryshme, por të bashkuara për të njëjtin qëllim”.