Indonezi. Shpërthim brenda një katedraleje katolike
Të plagosurit duhet të jenë së paku 14, ndërmjet të cilëve, pesë besimtarë që po shkonin në kishë për Meshën e së Dielës së Larit. Sipas policisë vendase, ishte sulm i kryer nga dy kamikaze. Shpërthimi ndodhi në qytetin Makassar, në ishullin indonezian të Sulawesit.
R. SH. - Vatikan
Dy kamikaze mbi një moto u hodhën në erë jashtë kangjellave kryesore të katedrales katolike të Makassarit, në Indonezi, gjatë Meshës të së Dielës së Larit. “Donin të hynin në kompleksin e Kishës” - shpjegon zëdhënësi i policisë, Argo Yuwono. Dy atentatorët vdiqën gjatë shpërthimit, ndërsa të plagosurit, ndërmjet të cilëve të posaardhurit për të ndjekur kremtimin e kësaj dite të madhe, janë rreth 14.
Kishat, në shënjestër
Në Indonezi kishat e krishtera janë shpesh në shënjestër të ekstremistëve islamikë. Në maj 2018, në ishullin e Javës, tre atentate kryer mbi kishat katolike, shkaktuan 13 të vdekur. Pas ngjarjes, Isis pranoi autorësinë e krimit.
28 mars 2021, 13:41
