KISHA

Të meditojmë me Ungjillin e së dielës XVI të vitit

Kësaj së diele, e 16-ta e vitit kishtar A, Ungjilli sipas Mateut, në kreun 13, na paraqet shembëlltyrën e mirënjohur të grurit e të egjrës. Jezu Krishti na bën të kuptojmë se gjithnjë në botë do të ketë grurë e egjër në luftë të vazhdueshme. Është beteja e përjetshme ndërmjet së mirës së së keqes. Por Zoti e lë të rritet edhe egjrën e vetëm në fund e jep gjykimin. Prandaj, në këtë botë, ku egjra shpesh përzihet me grurin e madje, ku ai që deri dje ishte nga ana e grurit, sot mund të ndodhet nga ana e egjrës, duhet ta pyesim veten në ç’fushë jemi, që të bëjmë pjesë në fund në ato të korra, që Hyji i vendos në hambarin e vet. Por, ja pjesa ungjillore...

R.SH. - Vatikan

²⁴ Në atë kohë, Jezusi u tregoi edhe një shëmbëlltyrë tjetër: “Mbretëria e qiellit është e ngjashme me njeriun që mbolli farë të mirë në arën e vet. ²⁵ Ndërkohë që njerëzit po flinin, erdhi armiku i tij, mbolli egjër nëpër grurë e shkoi. ²⁶ Kur u rritën të mbjellat dhe lidhën frytin, atëherë u duk edhe egjra. ²⁷ Shërbëtorët iu afruan zotit të shtëpisë dhe i thanë: ‘Zotëri, a nuk mbolle farë të mirë në arën tënde? Nga doli, pra, egjra? ²⁸ Ai u përgjigji: ‘Armiku e bëri këtë!’ Atëherë i thanë shërbëtorët: ‘A të shkojmë e ta mbledhim?’ ²⁹ Jo - u përgjigji ai - se duke e mbledhur egjrën druaj se, bashkë me të, nxirrni edhe grurin! ³⁰ Lëni të rriten bashkë deri në të korra. Në kohë të korrjes do t’u them korrëtarëve: mblidhni më parë egjrën dhe lidheni duaj për ta djegur e grurin mblidheni në drithnikun tim!’” (Mt 13,24-30)