Jeruzalemet e Evropës: Rrëshajë shprese e paqeje
R. SH. - Vatikan
Shtegtim ideal, që do të bashkojë Jeruzalemin me shtatë qytete të tjera evropiane, në të cilin Verona do të jetë “filli i kuq”. Nesër, 31 maj, Dita e Rrëshajëve, një video prej një ore, do t’i krijojë mundësinë kujtdo të niset nga Qyteti Shenjt, për të arritur në Manastirin e Jeruzalemit të Ri të qytetit Istra, në distriktin e Moskës, që ruhet prej shekujsh nga murgjërit ortodoksë, pastaj tek Kisha e Varrit Shenjt, në Miechov të Polonisë e tek ajo e Gorlitz, në Gjermani. Etapë tjetër do të jetë ajo e Sarajevës, Jeruzalemi i Evropës. Për një ndalesë, pastaj, në Verona, Jeruzalemi i vogël e tek caku i madh i shtegtimit evropian, Santiago i Kompostelës. Së fundi, Roma, Jeruzalemi i Ri!
Lidhja simbolike ndërmjet disa qyteteve dhe Tokës Shenjte
Projekti “Jeruzalemi dhe Evropa: Rrëshajë shprese e paqeje”, është nismë e “Verona Minor Hierusalem”, frymëzuar nga fakti se qyteti venet është një Jeruzalem i vogël, me kishat e veta, që të kujtojnë menjëherë Tokën Shenjte. Prej këndej, organizatorët u lidhën edhe me qytetet tjera evropiane që, ashtu si Verona, e kanë një rrënjë nga Toka Shenjte, lidhen në një farë mënyre me Varrin Shenjt, me Shpellën e Betlehemit a me ndonjë emër toponomastik të Tokës Shenjte. Prej këndej, ideja për t’u bashkuar, për t’i rivlerësuar rrënjët e përbashkëta të së kaluarës e për t’i bashkuar të gjithë në një shtegtim të tillë simbolik, që të kujton shtegtimet e lashta, të cilat e mbanin të lidhur Evropën. Shtegtim në gjurmët e tyre. E meqë në këto çaste Covid 19 i pengon shtegtimet, u mendua të bëhej një shtegtim virtual, i cili të kujton lidhjet arkitektonike ndërmjet varreve të shenjta e maleve shenjte, që gjinden nëpër Evropë. Duke u nisur nga Jeruzalemi i lashtë, për të arritur tek Jeruzalemet e vogla evropiane. E kjo të kujton edhe shtegtimet e kahmotshme, që bënin njerëzit nëpër Evropë. Ishte një lëvizje masive, që hapte horizonte të reja përmes takimeve me të tjerët e njohjes nga afër të vendeve të tjera. Mesazh i madh, ky!
Nga imzot Pizzaballa, një mesazh paqeje e shprese
Ky shtegtim na krijon mundësinë që, duke ndenjur qetë-qetë në shtëpi, të lëvizim nga një vend në tjetrin e të sodisim, falë prijësve të mirëpërgatitur, bukurinë dhe shenjtërinë e këtyre vendeve, duke krijuar kështu, një model të ri shtegtimi, që do të na e zgjerojë shumë vizionin, duke na përcjellë edhe mesazhin e paqes e të shpresës, si ai që do t’u përcjellë shikuesve imzot Pizzaballa, administrator apostolik i Patriarkatit latin të Jeruzalemit. Gjatë lidhjes me këto vise, do të mund të soditen vendet shenjte, shoqëruar me historinë e tyre e me dëshmi të dhëna nga vizitorët e murgjërit, që jetojnë në këto vende, ku ndjehet fuqimisht frymëzimi i Varrit të Shenjtë.
Është shtegtim për ta jetuar harmoninë në larmi! Që të hap kufijtë për të hyrë nga sotmja, në të kaluarën e në të ardhmen.
Kushdo që dëshiron të marrë pjesë në ngjarje duhet të regjistrohet paraprakisht, falas, në kanalin përkatës, në facebook-un ose në instagramin e Fondacionit Verona Minor Hierusalem.
