കോവിദ് 19 ദുരന്തം: സഹായവുമായി “കാരിത്താസ് ഇൻറർനാസിയോണാലിസ്”

ജോയി കരിവേലി, വത്തിക്കാൻ സിറ്റി

കോവിദ് 19 ദുരന്ത നിവരാണത്തിന്  സാമ്പത്തിക സഹായവുമായി ഒരു ആഗോള നാണ്യ നിധി, കത്തോലിക്കാസഭയുടെ ഉപവിപ്രവർത്തനങ്ങളെ അന്താരാഷ്ട്ര തലത്തിൽ ഏകോപിപ്പിക്കുന്ന സംഘടനയായ “കാരിത്താസ് ഇൻറർനാസിയോണാലിസ്” രൂപീകരിച്ചു.

ഈ ആഗോള നാണ്യ നിധി സാർവ്വലൗകിക കത്തോലിക്കാസഭയുടെ ഐക്യദാർഢ്യത്തിൻറെ ദൃശ്യ അടയാളമാണെന്ന് പ്രസ്തുത സംഘടന ഒരു വിജ്ഞാപനത്തിൽ വെളിപ്പെടുത്തി.

ഈ മഹാമാരിയുടെ സംക്രമണം തടയുന്നതിനും പ്രതിരോധിക്കുന്നതിനും വേണ്ടി പ്രാദേശിക കാരിത്താസ് ഉൾപ്പടെയുള്ള  കത്തോലിക്കാ സംഘടനകൾ നടത്തുന്ന പ്രവർത്തനങ്ങൾക്ക് ഈ നാണ്യനിധി സഹായം നല്കും. 

മുഖാവരണങ്ങൾ കൈയ്യുറകൾ, ശുദ്ധജലം, തുടങ്ങിയവ ലഭ്യമാക്കുന്നതിനും ഈ നാണ്യനിധി സഹായകമാകും.

കോവിദ് 19 ദുരന്തത്തോടനുബന്ധിച്ച് ഫ്രാൻസീസ് പാപ്പാ രൂപികരിച്ചിരിക്കുന്ന സമിതിയിൽ “കാരിത്താസ് ഇൻറർനാസിയോണാലിസ്” അംഗമാണ്.