"സിഗ്നിസി"ന്റെ ഏഷ്യാ ഘടകത്തിന്റെ വാര്ഷിക സമ്മേളനം ഡല്ഹിയില്
ജോയി കരിവേലി, വത്തിക്കാന് സിറ്റി
സമ്പര്ക്കമാദ്ധ്യമ ആഗോള കത്തോലിക്കാ സംഘടനയായ “സിഗ്നിസ്” (SIGNIS)-ന്റെ ഏഷ്യാഘടകത്തിന്റെ വാര്ഷിക സമ്മേളനം ഡല്ഹിയില് ഞായറാഴ്ച (04/08/19) ആരംഭിക്കും.
ഈ ഷഡ്ദിന സമ്മേളനം ഒമ്പതാം തിയതി (09/08/19) സമാപിക്കും.
“മാനവസമൂഹ നിര്മ്മിതിയില് വിനിമയമാദ്ധ്യമങ്ങളുടെ പങ്ക്” എന്നതാണ് ഈ സമ്മേളനത്തിന്റെ വിചിന്തന പ്രമേയം.
ഡല്ഹിയിലെ തിരുഹൃദയ കത്തീദ്രല് ദേവാലയത്തില് സാഘോഷമായ ദിവ്യബലിയോടെ സമ്മേളനത്തിനു തിരിതെളിയും.
2018-ലെ വാര്ഷികസമ്മേളന വേദി തായ്ലന്റിന്റെ തലസ്ഥാനമായ ബാങ്കോക്ക് ആയിരുന്നു.
സിനിമയ്ക്കും ദൃശ്യശ്രവ്യമാദ്ധ്യമങ്ങള്ക്കുമായുള്ള അന്താരാഷ്ട്ര കത്തോലിക്ക സംഘടന ആയിരുന്ന ഒസിഐസി (OCIC)-യും റേഡിയോ-ടെലവിഷന് എന്നിവയ്ക്കായുള്ള അന്താരാഷ്ട്ര കത്തോലിക്കാസംഘടനയായിരുന്ന “ഊണ്ട” (UNDA)-യും ലയിച്ചാണ് 2001-ല് “സിഗ്നിസ്” രൂപം കൊണ്ടത്.
നൂറില്പ്പരം നാടുകളില്, അച്ചടി മാദ്ധ്യമങ്ങള്, റേഡിയോ, ടെലവിഷന്, സിനിമ, മാദ്ധ്യമ വിദ്യഭ്യാസം, ഇന്റര്നെറ്റ് തുടങ്ങിയ വിവിധ മേഖലകളില് പ്രവര്ത്തിക്കുന്നവര് “സിഗ്നിസ്”-ല് അംഗങ്ങളാണ്.
“സിഗ്നിസ്” എന്ന നാമം ഒരു ചുരുക്ക സംജ്ഞയല്ല. അടയാളം എന്നര്ത്ഥം വരുന്ന “സൈന്” (SIGN) എന്ന ആംഗലപദവും അഗ്നി എന്നര്ത്ഥമുള്ള “ഈഞിസ്” (IGNIS) എന്ന ലത്തീന് വാക്കും ചേര്ത്ത് രൂപപ്പെടുത്തിയതാണ് “സിഗ്നിസ്” (SIGNIS)
വായനക്കാർക്ക് നന്ദി. സമകാലികസംഭവങ്ങളെക്കുറിച്ച് കൂടുതലായി അറിയാൻ ഇവിടെ ക്ലിക് ചെയ്ത് വത്തിക്കാൻ ന്യൂസ് വാർത്താക്കുറിപ്പിന്റെ സൗജന്യവരിക്കാരാകുക: