Vatican News
Ռայի Պատրիարքը Ռայի Պատրիարքը 

Ռայի Պատրիարքը կոչ ուղղեց ամէնէն արագ ժամանակամիջոցին կառավարութիւն մը կազմելու

Ռայի պատրիարքը ընդունեց արտաքին գործոց եւ արտերկրի լիբանանցիներու հարցերու նախարարի պաշտօնակատար Շարպել Ուեհպէն, որուն հետ քննարկեց լիբանանեան իրադարձութիւնները:

Մարոնի համայնքի Պշարա Ռայի պատրիարքը երէկ Պքերքէի մէջ նախագահեց կիրակի օրուան Ս. պատարագին, որուն ընթացքին արտասանեց քարոզ մը` զարմանք յայտնելով, որ տակաւին ոմանք հարց կու տան, թէ ժողովուրդը ինչո՞ւ ընդվզած է:

Միւս կողմէ, Ռայի պատրիարքը երէկ ընդունեց արտաքին գործոց եւ արտերկրի լիբանանցիներու հարցերու նախարարի պաշտօնակատար Շարպել Ուեհպէն, որուն հետ քննարկեց լիբանանեան իրադարձութիւնները:

Նշենք, որ Ուեհպէ հարցազրոյցի մը ընթացքին յայտնեց, որ ինք Գահիրէէն վերադարձին հեռաձայնային հաղորդակցութիւն մը ունեցած է Լիբանանի մէջ Իրանի դեսպանին հետ եւ անոր յայտնած իր դիտողութիւններն ու ընդվզումը իրանեան  «Ալամ» պատկերասփիւռի կայանին կողմէ Պքերքէի եւ Ռայի պատրիարքին դէմ կեցուածքներ սփռելու պատճառով:

«Այս իմաստով Իրանի դեսպան Մոհամետ Ժալալ Ֆիրուզնիա ինծի յայտնեց, թէ Թեհրան կը դատապարտէ նման արարքներ», ըսաւ ան:

Ուեհպէ հաստատեց, որ ինք այսօր հանդիպում մը պիտի ունենայ Ֆիրուզնիայի հետ:

Ռայի պատրիարքին այցելեց նաեւ երեսփոխան Ֆարիտ Հայքալ Խազեն, որ հանդիպումէն ետք յայտնեց, թէ իրենք կատարելապէս կը բաժնեն Ռայի պատրիարքին մտավախութիւնները:

Ան հաստատեց, որ Ռայի պատրիարքը կոչ ուղղած է հանրապետութեան նախագահին եւ քաղաքական բոլոր ուժերուն ամէնէն արագ ժամանակամիջոցին կառավարութիւն մը կազմելու` փրկելու համար Լիբանանը:

Խազեն անհրաժեշտ նկատեց Լիբանանի յատուկ միջազգային խորհրդաժողով մը կազմակերպելու Ռայի պատրիարքին նախաձեռնութեան զօրակցիլ:

Պքերքէի եւ Հըզպալլայի միջեւ խորհրդակցութիւններուն մասին հարցումի մը պատասխանելով Խազեն յայտնեց, որ վաղը` երեքշաբթի, 9 մարտ 2021-ին, Պքերքէի եւ Հըզպալլայի միացեալ յանձնախումբը պիտի գումարէ միացեալ նիստ մը, որուն լոյսին տակ կարելի պիտի ըլլայ սկսիլ երկխօսութեան մը, «որ կը մաղթենք արդիւնաբեր կ՛ըլլայ Լիբանանի շահերը ապահովելու առումով», ըսաւ ան:

Քաղուած «Ազդակ»էն

08/03/2021, 08:55