Նախարար Այվազեանի հեռախօսազրոյցը արք. Կալլակերի հետ
Մարտի 31-ին ԱԳ նախարար Արա Այվազեանը հեռախօսազրոյց ունեցաւ Սուրբ Աթոռի պետութիւնների հետ յարաբերութիւնների քարտուղար արք. Պոլ Ռիչարդ Կալլակերի հետ:
ԱԳ նախարարը վերահաստատեց Հայաստանի պատրաստակամութիւնը՝ առաւել խորացնելու և ամրապնդելու Սուրբ Աթոռի հետ պատմական և հոգևոր համընդհանուր արժէքների վրայ հիմնուած յարաբերութիւնները: Մտքեր փոխանակուեցին սերտ երկխօսութեան և բարձր մակարդակով շփումների դինամիկայի ամրապնդման ուղղութեամբ ձեռնարկուելիք քայլերի շուրջ:
Զրուցակիցներն անդրադարձան նաև տարածաշրջանային անվտանգութեան և կայունութեան հարցերի: Հայաստանի արտաքին քաղաքական գերատեսչութեան ղեկավարը կարևորեց ռազմական գործողութիւնների դադարեցմանը և պատերազմին յաջորդած շրջանում խաղաղութեան հաստատմանն ուղղուած Ֆրանցիսկոս Պապի կոչերը:
ՀՀ ԱԳ նախարարը Սուրբ Աթոռի պետութիւնների հետ յարաբերութիւնների քարտուղարին ներկայացրեց նաև թուրք-ադրբեջանական ագրեսիայի հետևանքով առաջացած հումանիտար հարցերի հասցէագրման ուղղութեամբ ձեռնարկուող քայլերը:
Որպէս անյապաղ լուծում պահանջող հարց՝ նախարարն շեշտեց ադրբեջանական կողմի պատանդառութեան մէջ գտնուող հայ գերիների անվտանգ հայրենադարձումը:
Ընդգծելով Արցախի՝ Ադրբեջանի վերահսկողութեան տակ յայտնուած տարածքներում հայկական մշակութային և կրօնական ժառանգութեան պահպանութեան հրատապութիւնը՝ նախարար Այվազեանը խստագոյնս դատապարտեց Ադրբեջանի իշխանութիւնների կողմից քրիստոնէական մշակութային արժէքների միտումնաւոր պղծման և ոչնչացման քաղաքականութիւնը: Այս առնչութեամբ կարևորուեց միջազգային հանրութեան գործուն միջամտութիւնը:
Աղբիւր` Սուրբ Աթոռի մօտ ՀՀ դեսպանութիւն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
