Հայաստանի եւ Արցախի մէջ. Դեկտեմբեր 19-էն կը յայտարարուի եռօրեայ սուգ
Հայաստանի եւ Արցախի մէջ 19 դեկտեմբերէն պիտի յայտարարուի եռօրեայ սուգ, պատերազմի նահատակներու յիշատակին նուիրուած արարողութիւններ պիտի կազմակերպուին:
«Արմէնբրես»-ի հաղորդմամբ՝ այս մասին յայտնած են ՀՀ վարչապետ Նիկոլ Փաշինեանը եւ Արցախի Հանրապետութեան նախագահ Արայիկ Յարութիւնեանը:
«Դեկտեմբերի 19-ին լրանում է ռազմական գործողութիւնների աւարտի 40-րդ օրը: Եւ այս կապակցութեամբ դեկտեմբերի 19-ից ՀՀ-ում եռօրեայ սուգ կը յայտարարուի, նաեւ կը կազմակերպուի յիշատակի երթ՝ Հանրապետութեան հրապարակից դէպի Եռաբլուր»,- դիմատետրի ուղիղ եթերի ժամանակ ըսած է ՀՀ վարչապետը:
Երկրին մէջ պիտի ըլլան նաեւ յիշատակի այլ միջոցառումներ:
Վարչապետը նշած է՝ այդ օրուայ դրութեամբ հաւանական է, որ ոչ բոլոր նահատակներու մարմինները յայտնաբերուած ըլլան: «Կ'ունենանք չճանաչուած բազմաթիւ մարմիններ, բայց պետական այս կարգի որոշումը, կարծում եմ, այլեւս չի կարելի յետաձգել»,-ըսած է Փաշինեանը:
Վարչապետը կրկին հաւաստիացուցած է, որ մարմիններու որոնման, ճանաչման, անհետ կորածներու գտնուելու վայրի պարզաբանման աշխատանքները աւելի աշխոյժ կը դառնան:
Արցախի նախագահ Արայիկ Յարութիւնեանն ալ դիմատետրի իր էջին գրած է. «Յարգելի՛ հայրենակիցներ, հաշուի առնելով, որ դեկտեմբերի 19-ին լրանում է 44-օրեայ պատերազմի զինադադարի 40-րդ օրը՝ ՀՀ վարչապետի հետ պայմանաւորուել ենք Արցախի եւ Հայաստանի Հանրապետութիւններում այդ օրուանից յայտարարել եռօրեայ սուգ՝ ոգեկոչելու Հայրենիքի պաշտպանութեան համար զոհուած մեր նահատակների յիշատակը:
Նրանց անունները յաւէտ մնալու են մեր սրտերում եւ հայոց պատմութեան էջերում՝ պարտաւորեցնելով մեզ հետագայ երթում շարունակել նրանց հայրենանուէր գործը: Ուստի, այն լինելու է ցաւի, հպարտութեան ու պարտաւորութեան սուգ հայ ազգի համար»:
Քաղուած Արեւելք» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ