Պայտըն պաշտօնապէս Միացեալ Նահանգներու նախագահի պաշտօնին դեմոկրատական կուսակցութեան թեկնածու
Դեմոկրատական կուսակցութիւնը իր ընդհանուր ժողովին ընթացքին պաշտօնապէս Ճօ Պայտընը առաջադրեց իբրեւ 3 նոյեմբերին նախատեսուած Միացեալ Նահանգներու նախագահական ընտրութեան թեկնածու:
Միացեալ Նահանգներու նախկին նախագահներ Պիլ Քլինթըն եւ Ճիմի Քարթըր «Ղեկավարութիւնը կարեւոր է» խորագիրով ընդհանուր ժողովի երկրորդ օրուան ընթացքին շեշտեցին. «Պայտըն փորձառութիւնն ու պարկեշտութիւնը ունի վերականգնելու Ամերիկան, զոր համաճարակը քանդեց»:
«Պայտըն պիտի ներկայացնէ հանրապետական նախագահ Տանըլտ Թրամփի վարչակազմի քաոսէն ետք բնական կացութեան վերադարձը», ըսաւ Քլինթըն` նշելով. «Այսպիսի պահու մը մէջ պէտք է Ձուաձեւ գրասենեակը ղեկավարութեան կեդրոն ըլլայ, սակայն ատոր փոխարէն փոթորիկի կեդրոն մըն է: Միայն քաոս կայ: Մէկ բան բնաւ չի փոխուիր` պատասխանատուութիւնը մերժելն ու ուրիշները այպանելը»:
Քաղուած «Ազդակ»էն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ