Արամ Ա. Կաթողիկոսի նամակը՝ Յունաստանի Վարչապետին
Ծանօթ է մեր ընթերցողներուն, թէ «Այիա Սոֆիա» տաճարը մզկիթի վերածելու թուրք պետութեան որոշումէն անմիջապէս ետք, առաջին հակազդողներէն եւ անընդունելի որոշումը դատապարտողներէն եղաւ Մեծի Տանն Կիլիկիոյ Արամ Ա. Կաթողիկոս, որու յայտարարութիւնը միջազգային արձագանգ ունեցաւ, ինչպէս նաեւ տարածուեցաւ Յունաստանի լրատուական միջոցներէն։
Իր յայտարարութեան մէջ, Վեհափառ Հայրապետը կը նշէր, թէ Օսմանեան կայսրութեան այլամերժ քաղաքականութիւնը կը շարունակէ թափանցել արաբական աշխարհէն մինչեւ արեւմուտք, միջազգային ընտանիքի լռութեան տակ։
Նորին Սրբութիւնը նաեւ հարց կու տար, թէ ուր էին արեւմտեան աշխարհի քաղաքական եւ կրօնական ղեկավարութիւնները, երբ Հայոց ցեղասպանութենէն ետք հայկական եկեղեցիները վերածուեցան ագարակներու եւ հանրային վայրերու։
Միջազգային տարողութիւն ստացած «Այիա Սոֆիա»ի խնդիրին առնչութեամբ, Արամ Ա. Կաթողիկոս յատուկ նամակ ուղարկեց Յունաստանի վարչապետ Քիրիաքոս Միցոթաքիսին, որուն մէջ Վեհափառը կը դատապարտէ Թուրքիոյ ապօրէն եւ անբարոյ որոշումը եւ կը մատնանշէ, որ Եւրոպան պէտք չէ լուռ մնայ այս արարքին դիմաց։
Արամ Ա. Վեհափառը, իր նամակին մէջ կը վստահեցնէ, թէ Հայաստանեայց եկեղեցին եւ հայ ժողովուրդը կը կանգնին Յունաստանի եւ բոլոր անոնց կողքին, որոնք կը դատապարտեն Թուրքիոյ ապօրինի քայլը եւ կոչ կ՚ուղղեն թրքական պետութեան վերատեսելու իր որոշումը։
Քաղուած «Եռագոյն» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ