Մարոնի եպիսկոպոսներու խորհուրդը կոչ ուղղեց դիւրացնելու կառավարութեան կազմութեան հոլովոյթը:
Մարոնի համայնքի Պշարա Ռայի պատրիարքը երէկ Պքերքէի մէջ նախագահեց Մարոնի եպիսկոպոսներու խորհուրդի ընթացիկ նիստին, որուն ընթացքին քննարկուեցան Լիբանանը յուզող իրադարձութիւնները:
Նիստէն ետք հրապարակուած հաղորդագրութեան համաձայն, խորհուրդը կոչ ուղղեց անսալու լիբանանցիներու պահանջին եւ կազմելու մասնագէտներու կառավարութիւն մը, որուն մաս կը կազմեն պարկեշտ անձնաւորութիւններ, որոնց նպատակը կ՛ըլլայ Լիբանանը փրկել տնտեսական իր տագնապէն:
Մարոնի եպիսկոպոսներու խորհուրդը խստիւ դատապարտեց դրամատնային համակարգը, որուն պատճառով լիբանանցիներուն իրաւունքները, յատկապէս ամսական աշխատավարձերը կ՛ոտնակոխուին:
Միաժամանակ, խորհուրդը դատապարտեց դրամատուներուն դէմ գործուած յարձակումները, ինչպէս նաեւ լիբանանեան բանակն ու ապահովութեան ուժերը միշտ յարձակումի թիրախ դարձնելու լիբանանցի քաղաքացիներուն բռնարարքները:
Մարոնի եպիսկոպոսներու խորհուրդը կոչ ուղղեց դիւրացնելու կառավարութեան կազմութեան հոլովոյթը:
Անդրադառնալով Միջին Արեւելքի իրադարձութիւններուն` խորհուրդը հաստատեց, որ Լիբանանը պէտք չէ շրջանային բախումներու միջամուխ դարձնել, այլ` պաշտպանել երկրին ապահովական կայունութիւնը:
Քաղուած Ազդակէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ