Հնդկաստանի մէջ վերականգնուեցաւ 300 տարեկան Հայկական ցուցանակ մը
Վերջերս, Հնդկաստանի Սայտապետ քաղաքին մէջ վերականգնուեցաւ 300 տարուան հայկական ցուցանակ մը, հաղորդեց «The Times of India» թերթը:
Ցուցանակը, որ կը յիշատակէ 1726ի Մարմալոնկ կամուրջի կառուցումը Այտար գետին վրայ՝ հայ վաճառական, Մատրասի մէջ հայ համայնքի առաջնորդ Խոճա Պետրոս Ոսկանի կողմէ, յայտնուած էր գետնին տակ: Սակայն այժմ, Հայաստանի հիւպատոսարանը, քաղաքի ղեկավարութեան հետ միատեղ ջանքերով կրցաւ վերականգնել զայն իր նախնական տեղը:
«Փետրուարին, 20 հոգինոց խումբ մը այցելեց քաղաք եւ տեսաւ ցուցանակը», ըսաւ Չեննայի մօտ Հայաստանի պատուաւոր հիւպատոս Շիւկումար Իշվարան եւ նշեց, որ ցուցանակը գրեթէ անցած էր գետնի տակ:
Նախորդ շաբաթ, արդէն ցուցանակը վերականգնուեցաւ վերամբարձ կռունկի միջոցով: Կը նշուի, որ ցուցանակի բացման պաշտօնական արարողութիւնը պիտի կատարուի Մայիսին տեղի ունենալիք ընտրութիւններէն ետք:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
