Չիլէի մէջ ստեղծուեցաւ չարաշահումներու կանխարգիլման կեդրոն. Քահանայապետին պատգամը

Ռոպէր Աթթարեան - Վատիկան

Ֆրանչիսկոս Սրբազան Քահանայապետին յատուկ պատգամով մը, Հինգշաբթի 15 օգոստոս 2019-ին, Չիլէի մէջ բացումը կատարուեցաւ Քուիտա հիմնադրամին, որուն նպատակն է զբաղիլ  մանկապղծութեան կանխարգիլումի հարցերով, ինչպէս նաեւ քաղաքական որոնումներ ու հետազօտութիւններ իրագործել ի նպաստ անչափահասներու պաշտպանութեան։ Ծրագիրը նախաձեռնութիւնն է Չիլէի Կաթողիկէ Համալսարանին եւ  “Fundación para la Confianza” հաստատութեան։ Այս վերջինս  հիմնադրուած է 2010 թուականին, երբեմնի քահանայ Ֆերնանտօ Քատիմայի գործադրած ոտնձգութիւններու զոհերուն  վերապրողներու կողմէ, առաքելութիւն ունենալով պայքարիլ անչափահասներու չարաշահումներու դէմ, ապա ընկերանալ ու առաջնորդել այդ ոճիրներու զոհերուն։