ֆրանչիսկոս Պապին ցաւակցագիրը Կարդինալ Ակիլարի մահուան ի լուր։
Ռոպէր Աթթարեան - Վատիկան
Կարդինալ Փարոլինի ստորագրութիւնը կրող հեռագիրով ֆրանչիսկոս Սրբազան Քահանայապետը Սպանիոյ Փամփլոնա թեմին երբեմնի Արքեպիսկոպոս` 89 ամեայ Կարդինալ ֆերնանտօ Սեպասթեան Ակիլարի մահուան ի լուր, անոր յաջորդ գերապայծառ ֆրանսիսքօ Փերես Կոնզալէսին յղած մէկ հեռագիրին մէջ կը յիշէ ննջեցեալին նուիրումը Եկեղեցւոյ ծառայութեան ու այդ ծառայութեան առատ պտուղները։
Քահանայապետը ապա «րախտագիտութեամբ» կը յիշէ Ծիրանաւորին յանձնառումը` ըլլայ եպիսկոպոսական համահաւաք դասէն ներս, ըլլայ իրեն յանձնուած թեմերուն մէջ ու նաեւ անոր Սալամանքայի Քահանայապետական համալսարանէն ներս դաստիարակի ծառայութիւնը։
Նորին Սրբութիւնը հուսկ ցաւակցութիւններ ու հայրական մօտիկութիւն կ՛արտայայտէ ննջեցեալի հարազատներուն, եղբայրակից միաբաններուն, քահանաներուն ու Կարդինալ Ակիլարէն մինչեւ 2007 առաջնորդուած Աւագ Թեմին բոլոր հաւատացեալներուն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ