Ֆրանչիսկոս Պապին ցաւը Եգիպտոսի Ղպտի ուխտաւորներու դէմ ահաբեկչական արարքին ի լուր։

Ռոպէր Աթթարեան  - Վատիկան

Կիրակի 4 նոյեմբեր 2018-ի կէսօրին, իր գրասենեակի պատուհանէն արտասանած Հրեշտակ Տեառն Mարեմեան աղօթքի աւարտին Ֆրանչիսկոս Սրբազան Քահանայապետը ողջունելով Սուրբ Պետրոսի հրապարակին վրայ համախմբուած ուխտաւորները, իր խոր ցաւը յայտնեց՝ ի լուր երկու օրեր առաջ, Եգիպտոսի Ղպտի Օրթոտոքս եկեղեցին հարուածող ահաբեկչական յարձակումին։

«Կ՛աղօթեմ զոհերուն համար, ուխտաւորներ որոնք սպաննուեցան պարզապէս իրենց քրիստոնեայ պատկանելիութեան համար ու Ամենասուրբ Մարիամէն կը խնդրեմ որ մխիթարէ անոնց ընտանիքները ու համայն հասարակութիւնը» ըսաւ Քահանայապետը ապա ակնարկեց երէկ՝ Լատերանի Սուրբ Յովհաննէս Պազիլիքային մէջ Երանելի հռչակուած Քոյր  Քլելիա Մերլոնիին, հրաւիրելով հաւատացեալները հետեւելու անոր բարութեան եւ ողորմութեան օրինակին։ 

Սրբազան Պապը ողջունեց հուսկ հրապարակը համախմբուած զանազան վայրերէն ժամանած ուխտաւորներուն խումբերը ապա հրաժեշտ առաւ ներկաներէն բոլորին մաղթելով բարի կիրակի ու խնդրելով որ չի մոռնան աղօթելու իրեն համար։