ֆրանչիսկոս Պապ .«ձրի ստացանք, ձրի տանք»:
Վազգէն Աբարդեան - Վատիկան
Երեքշաբթի, 11 յունիսին, առաւօտեան, Վատիկանի Տոմուս Սանթա Մարթա Մատրան մէջ ֆրանչիսկոս Պապ մատուցանեց Սուրբ Պատարագ եւ որուն ընթացքին ներկայացուցած քարոզին առանցքը եղաւ Աստուծոյ անշահախնդիր սէրը, ընդգծելով, որ պէտք է անվճար պարգեւել, այն ինչ Աստուծմէ ձրի ստացանք եւ պէտք է ընդլայնել մեր սիրտերը՝ շնորհքը ընկալելու համար. ստացուած շնորհք եւ ոչ թէ վաճառուած:
Մեկնաբանելով օրուան սուրբ գրային ընթերցումը՝ քաղուած Մատթէոսի աւետարանէն եւ ուր կը խօսուի աշակերտներուն առաքելութեան մասին, Սրբազան Հայրը նկատել տուաւ, որ այդ առաքելութիւնը բոլոր քրիստոնեաներուն առաքելութիւնն է:
«Քրիստոնեայ մը չկրնար անշարժ մնալ: Քրիստոնեայի կեանքը ուղեւորութիւն է եւ որուն ընթացքին պէտք է քարոզել ըսելով, Աստուծոյ արքայութիւնը մօտ է: Սա է առաքելութիւնը, որ է կեանքի ծառայութիւն եւ ոչ թէ ծառայութիւն ստանալ: ըսաւ ֆրանչիսկոս Պապ տխուր երեւոյթ նկատելով Աստուծոյ ժողովուրդէն ծառայութիւն ստանալը:
Սրբազան Պապը ապա շեշտը դնելով Աստուծոյ պարգեւած անշահախնդիր շնորհքներուն վրայ յարեց, թէ Քրիստոնեային կեանքը ձրի կեանք է աւելցնելով որ այսօրուան աւետարանին մէջ Յիսուս կը խօսի փրկութեան մասին, որ ձրիաբար ստացուած շնորք է եւ պէտք է զայն անվճառ պարգեւել: Ան ընդգծեց, որ չէ կարելիէ փրկութիւնը գնել, որովհետեւ զայն անշահախնդրութեամբ ստացանք:
Ինչպէս Ատուած մեր հետ կատարեց, նոյնպէս մենք ուրիշներուն հետ պէտք ենք կատարել: ըսաւ ֆրանչիսկոս Պապ շեշտելով որ սա է Աստուծոյ անշահախնդրութիւնը, Աստուծոյ ամենէն գեղեցիկ բաներուն ամենէն գեղեցիկը:
Ֆրանչիսկոս Պապ եզրափակեց իր քարոզը շեշտելով «չկայ անշահախնդրութենէն դուրս Աստուծոյ հետ յարաբերութիւն»:
Ան ապա նախ քրիստոնեաները հրաւիրեց որ ձրի պարգեւեն, ապա եկեղեցւոյ հովիները յորդորեց, որ շնորհքը չվաճառեն, ինչ որ շատ տխուր երեւոյթ մըն է: ըսաւ Սրբազան Քահանայապետը :
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
