«Ողջո՜յն քեզի, հրեաներու թագաւոր» (Մարկոս 15, 18). Գերյ. Գէորգ Ծ. Վրդ. Զապարեանի խորհրդածութիւնը։
Ի՞նչ կու գայ մեր միտքը երբ «թագաւորութիւն» բառը լսենք: Մի գուցէ երեւակայենք շքեղ գահերու վրայ բազմած միջնադարեան թագաւորներ ու թագուհիներ, կամ՝ ի միտի ունենանք մերօրեայ թագաւորական ընտանիքներուն հմայքն ու փարթամութիւնը:
Ի՞նչ կու գայ մեր միտքը երբ «Յիսուս թագաւոր» ըսենք:
Իբրեւ Դաւիթի որդի, Յիսուս կը սեռի երկրաւոր թագաւորներու եւ իշխաններու արքայական զարմէն:
Իբրեւ Աստուծոյ Որդի, Ան տիեզերքի թագաւորն է:
Այնուհանդերձ, նայինք թէ ի'նչպէս Անոր հետ կը վարուին Երուսաղէմի բնակիչները:
- Ամբոխը Զինք կ'ամբաստանէ իբրեւ խռովարար, նոյնիսկ երբ Պիղատոս Զինք թագաւոր կը կոչէ (Մարկոս 15, 9 եւ 12).
- Զինուորները Զինք կը ծաղրեն՝ Անոր մեծարանք մատուցանել ձեւանալով (Անդ, 15, 16-20).
- Կը նախատուի բոլոր անոնցմէ, որոնք կը խորհին, թէ ճշմարիտ թագաւոր մը ի վիճակի պէտք է ըլլայ խաչէն իջնել եւ ինքզինք ազատել (Անդ, 15, 29-32):
Սակայն, Աստուծոյ արքայութեան մէջ, իրականութիւնը բոլորովին տարբեր է:
Արդարեւ, հո'ն
- Թագաւորը ինքզինք կ'ունայնացնէ եւ ծառայի կերպարանք կ'առնէ (Փիլիպեցիներուն 2,7).
- Թագաւորը Երուսաղէմի մօտենալով՝ կը նստի ոչ շքեղ կառքի մը մէջ, այլ՝ աւանակի մը վրայ (Մարկոս 11, 1-7).
- Թագաւորը, որպէսզի Իր ժողովուրդը փրկէ, կամաւորապէս կ'ենթարկուի դահիճներուն արձակած թուքին, իջեցուցած ապտակներուն եւ պաճառած վայրագ մահուան:
Սիրելի եղբայրներ եւ քոյրեր,
Մինչ պիտի ապրինք սկսող Աւագ Շաբաթուան Մեծ Խորհուրդներն ու Դէպքերը, մեր միտքը պահենք Յիսուսի թագաւորութեան ինչպիսութիւնը:
Այսօր, Յիսուս կը նստի Հօր Աստուծոյ աջ կողմը, փառաւորապէս իշխելով արարչագործութեան վրայ:
Բայց, Ան նաեւ ծառայող թագաւոր է, որ մեզ կը սիրէ՝ մահը յանձն առնելու չափ եւ տակաւին մեզ կը սիրէ՝ մեր ծանրագոյն մեղքերը ներելու աստիճան:
Ա'յս է Աստուծոյ թագաւորութեան գործելաոճը:
Նոյնը պարտի ըլլալ մեր ապրելակերպը, մեր հնարաւորութեան ներած չափով, որովհետեւ շնորհիւ Յիսուսի մահուան եւ յարութեան, պատուաստուեցանք Աստուծոյ արքայութեան ներարկումով:
Գիտակից ըլլանք, որ մեր երակներուն մէջ թագաւորական արիւն կը հոսի:
Յիսուսի մեզի վաստկած շնորհքի միջոցով այլեւս կրնանք ապրիլ՝
սիրով,
ծառայասիրութեամբ,
եւ վեհանձնութեամբ՝ ի սէր Աստուծոյ եւ մերձաւորին:
Մինչ սոյն ուղիէն կ'ընթանանք, ապահով ըլլանք, որ «արդարութեան պսակը» կը սպասէ մեզի եւ բոլոր անոնց, որոնք կը ծառայեն Յիսուսի թագաւորական պալատէն ներս (Բ Տիմոթէոս 4, 8):
Հ. Գ. Զ.
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ