Գարեգին Բ. Կաթողիկոսի Ս. Ծննդեան Հայրապետական Պատգամը. Օրհնաբանում ենք Նորածին Փրկչին

Սիրելի՛ հաւատաւոր զաւակներ մեր ի հայրենիս եւ ի սփիւռս,

Մեր Տէր Յիսուս Քրիստոսի Սուրբ Ծննդեան եւ Աստուածայայտնութեան տօնին, աղօթական ոգով համախմբուած մեր սուրբ եկեղեցիներում, օրհնաբանում ենք նորածին Փրկչին: Սուրբ Ծննդեան օրհնեալ այս օրը Բեթղեհեմի մսուրից ծագեց ճշմարիտ Լոյսը` լուսաւորելու համար մարդկանց հոգիները: «Այդ ճշմարիտ Լոյսն էր, որ լուսաւորում է ամէն մարդու, որ աշխարհ է գալու», գրում է Աւետարանիչը:

Աշխարհի փրկութեան համար մարդեղացած Աստուածորդու Սուրբ Ծնունդը աւետարանչի նման` սրբազան շարականագիրը համեմատում է արեգակի ծագման հետ` ասելով. «Ծագեցիր Հօրից` լուսաւորելու արարածներին, արդարութեան Արեգակ, Տէ՛ր, փա՛ռք Քեզ» (Շարական Սուրբ Ծննդեան): Աստուածորդին եկաւ փարատելու մեղքի ու մահուան խաւարը եւ մարդկութեանն առաջնորդելու դէպի իր Արարիչը: Փրկչի ծննդեան համեստ քարայրից ճառագեց հոգեւոր նորոգութեան, հոգեւոր զօրութեան արշալոյսը:

Ծննդեան օրից Յիսուս մանկանը վիճակուեցին հալածանքներ: Փրկիչն Իր ընտանիքի հետ փախստական դարձաւ Իր ծննդավայրից, երբ Նրա մահը ցանկացող Հերովդէսը կազմակերպեց մանուկների կոտորածը` կարծելով, թէ սպաննեց նորածին Աստուածորդուն եւ յաղթեց Նրան: Սակայն իրական յաղթութիւնը Քրիստոսինն էր, ով փրկչական Իր առաքելութեամբ չարչարանաց ճանապարհը պսակեց յարութեան փառաւոր յաղթանակով: Բոլոր դժուարութիւնների միջով անցնելով` Տէրը յոյս բերեց անկեալ մարդուն, փրկութիւն` մարդկութեանը, որ ընկղմուած էր անօրէնութիւնների եւ կռապաշտութեան խաւարի մէջ: Պատմութեան բոլոր ժամանակներում հերովդէսները աղէտ, աւեր ու թշուառութիւն են պատճառել մարդկութեանը, չարի ներգործութեամբ գլուխ են բարձրացրել հակառակութիւնն ու թշնամութիւնը, առաջադէմ ձեռքբերումների կողքին եղել են աղքատութիւն, կեղեքում ու անիրաւութիւն: Եւ այսօր էլ մարդիկ` մեղքերով ծանրաբեռն, հեռանում են Աստծուց, աշխարհը ալեբախւում է քաղաքական խարդաւանքներից, հասարակութիւններին տիրել է բեւեռացումների յանգեցնող նիւթապաշտութիւնը, եւ արդարութիւնն ու ճշմարտութիւնը դարձել են յարաբերական արժէքներ: Հակասական ու անհանգիստ այս աշխարհում Յիսուս Քրիստոս ծագում է որպէս արդարութեան Արեգակ, Լոյս ճշմարիտ` լուսաւորելու մարդկութեան կեանքի ուղին:

Սիրելինե՛ր, Քրիստոսի հրաշափառ Ծնունդը յոյսի եւ մխիթարութեան աղբիւր է մեր սրտաբեկ ժողովրդի համար յատկապէս վշտատանջ այս օրերին, երբ անդրադառնում ենք, որ մեր կեանքը եւս զերծ չեղաւ կործանարար սխալներից եւ մեղանչումներից: Անկայուն խաղաղութեան եւ պատերազմի սպառնալիքների յանդիման չդրսեւորուեց անհրաժեշտ զգօնութիւն, հայրենիքի ու ժողովրդի շահը ստորադասուեց նեղ ձգտումներին ու նկրտումներին: Աստուածամերժ ոգին եւ օտարածին գաղափարներն ու բարքերը ներթափանցեցին մեր հասարակութիւնից ներս: Մեր կեանքը հեռու չեղաւ կեղծիքից, զազրախօսութիւնից, անհանդուրժողութիւնից, ատելութիւնից ու թշնամանքից, որ սփռւում էր եւ շարունակում է սփռուել ամենատարբեր միջոցներով` մասնատելով մեզ եւ ցամաքեցնելով Քրիստոսի սէրը մեր մէջ: Իսկ Աւետարանը վկայում է. «Ինքն իր մէջ բաժանուած ամէն թագաւորութիւն աւերւում է, եւ ինքն իր մէջ բաժանուած ամէն քաղաք կամ տուն կանգուն չի մնայ» (Մատթ. 12.25): Արցախեան պատերազմի աղէտալի հետեւանքները տագնապի ու անորոշութեան զգացումներով են պաշարել մեր ժողովրդի զաւակների հոգիները: Արցախ աշխարհի զգալի մասի կորուստը, մեր հերոս զաւակների նահատակութիւնը, անօթեւան ու նիւթական կարիքի մէջ գտնուող տեղահանուած տասնեակ հազարաւոր արցախցի մեր եղբայրների ու քոյրերի, հազարաւոր վիրաւորների եւ գերեվարուած հայորդիների ցաւն ու վիշտը մեր ազգային կեանքը հայրենիքում ու սփիւռքում վերածել են մռայլ ու մթագնած գիշերուայ: Այս խաւարի, մղձաւանջային այս իրականութեան մէջ այսօր պայծառօրէն ծագում է արդարութեան Արեգակը` լուսաւորելու մեր ազգային ու հայրենական անդաստանը եւ Իր ջերմացնող զօրութեամբ բժշկութիւն պարգեւելու ազգիս վիրաւոր հոգուն:

Սիրելի՛ բարեպաշտ ժողովուրդ, մարդեղացեալ Աստուածորդու անբաւ սիրուն եւ փրկութեան շնորհին ապաւինելով մենք դարերի ընթացքում յաղթահարել ենք պատերազմների, աղէտների տառապանքներն ու զրկանքները, յուսախաբութիւնն ու յուսալքութիւնը եւ կերտել մեր կեանքի յաղթանակները: Այս օրերին եւս մեր հաւատքը կենդանի է նոյն վստահութեամբ: Մենք ի զօրու ենք վերստին հզօրացնելու ու շէնացնելու մեր հայրենիքը եւ մեր կեանքի նոր զարթօնքը իրականութիւն դարձնելու աշխարհասփիւռ հայութեան ներուժի ու ջանքերի մէկտեղումով, Հայաստան ու Արցախ համերաշխ ու միաբան հասարակութեամբ, զարգացած տնտեսութեամբ, գիտութեամբ ու կրթութեամբ, նորագոյն զինուորական սարքերով համալրուած բարձր մարտունակութեամբ բանակով: Ինչպէս պատերազմի տագնապալի օրերին, մեր սրտերը պիտի բաբախեն հայրենիքի սիրով, մեր մտքերն ու նուիրական զգացումները փարուած լինեն հայրենի սրբազան երկրին: Հայրենական կեանքի կայունութիւնը հաստատուն պահելու, երկիրը վտանգների չառաջնորդելու, առկայ ճգնաժամերը յաղթահարելու, արտագաղթի աղէտը կասեցնելու համար հարկ է ամէն յանձնառութիւն, ամէն զոհաբերութիւն: Մեր ազգի ու ժողովրդի համար օրհասական փորձութեան այս պահին ամուր մնանք յոյսով ու հաւատով եւ Տիրոջ կենարար զօրութեամբ գօտեպինդ` ուժ առնենք արհաւիրքներից յառնելու, երկնառաք օգնականութեամբ փարատելու մեզ պարտադրուած այս թանձր խաւարը եւ լուսաւորելու մեր կեանքի նոր հորիզոնները:

Սուրբ Ծննդեան եւ Աստուածայայտնութեան այս հոգենորոգ օրը հայցենք, որ Աստծոյ փրկութեան շնորհին ապաւինած` ընթանանք դէպի մեր իղձերի իրականացումը եւ մեր արդար իրաւունքների յաղթանակով պսակումը: Աղօթենք, որ Սուրբ Ծննդեան աւետաբեր լոյսով միշտ լուսաւորուի երկնակամարը մեր ազգային ու հայրենական կեանքի, յաւէտ պայծառ լինի մեր սուրբ եկեղեցին հոգեւոր դասի արդիւնաւոր ծառայութեամբ ու հաւատացելոց նուիրեալ ընթացքով, եւ հայոց աշխարհը պարուրուի մարդացեալ Փրկչի սիրով ու պարգեւած յոյսով: Թող Տէրը խաղաղութիւն պարգեւի համայն աշխարհին, մարդկանց հոգիներին, Իր խնամքի մէջ խաղաղ ու ապահով պահպանի հայրենի մեր երկիրը` Հայաստանն ու Արցախը, եւ շնորհի բարօր ու շէն կեանք աշխարհասփիւռ ազգիս հայոց, այսօր եւ միշտ եւ յաւիտեանս. ամէն:

Քրիստոս ծնաւ եւ յայտնեցաւ,
Ձեզ եւ մեզ մեծ աւետիս

ԳԱՐԵԳԻՆ Բ. ԿԱԹՈՂԻԿՈՍ
ԱՄԵՆԱՅՆ ՀԱՅՈՑ

6 յունուար 2021