Vatican News
Միութիւն Միութիւն 

2021-ի Քրիստոնեաների Միութեանը նուիրուած Աղօթքի Շաբաթուայ բնաբանը:

«Բնակուեցէք իմ սիրոյ մէջ, եւ դուք շատ պտուղ կտաք» (հմմտ. Յովհ. 15:5-9):

Պենտեկոստէի շրջանակներում նշուող 2020 թուականի Աղօթքի շաբաթը մօտենում է իր աւարտին, ուստի, Քրիստոնեաների միութեան խթանման Քահանայապետական խորհուրդը ներկայացնում է 2021 թուականի Քրիստոնեաների միութեանը նուիրուած Աղօթքի շաբաթուայ վերաբերեալ նիւթերը: Բնաբանը եւ նիւթերը ընտրուել ու պատրաստուել են Զուիցերիայի «Grandchamp» վանական միաբանութեան կողմից, որը մէկտեղ է հաւաքում քոյրերի՝ տարբեր Եկեղեցիներից եւ երկրներից:

Ունկնդրէ լուրը

Միաբանութիւնը հիմնադրուել է քսաներորդ դարի առաջին կէսին եւ հիմնադրման օրուանից ի վեր սերտօրէն կապուած է ինչպէս Թեզէի միաբանութեան, այնպէս էլ Աբբայ Փօլ Քութիւրիէի հետ, ով նշանաւոր անձ էր եւ կարեւոր դերակատարութիւն ունէր Քրիստոնեաների միութեանը նուիրուած Աղօթքի շաբաթ միջոցառման պատմութեան մէջ: Այսօր միաբանութեան կազմում կան մօտաւորապէս հինգ տասնեակ քոյրեր, ովքեր ներգրաւուած են քրիստոնեաների միջեւ հաշտեցման ուղիների որոնման գործում՝ առաջնորդուելով համայն մարդկութիւնը որպէս մէկ ընտանիք դիտելու եւ տիեզերքը՝ որպէս Տիրոջ արարչագործութիւն պահպանելու գաղափարով:

«Grandchamp»-ի միաբանութեան քոյրերի կողմից որպէս բնաբան է ընտրուել հետեւեալ խօսքը. «Բնակուեցէք իմ սիրոյ մէջ, եւ դուք շատ պտուղ կտաք» (հմմտ. Յովհ. 15:5-9): Այսպիսով, քոյրերը կարող էին իրենց հայեցողական կեանքի փորձն ու իմաստութիւնը կիսել միւսների հետ. բնակուել Աստուծոյ սիրոյ մէջ եւ մաքրագործուել Նրա Խօսքով՝ հոգեպէս աճելու համար:

Ներշնչուելով վեցերորդ դարի պաղեստինցի վանական Դորոթեոս Գազացու կերպարից՝ քոյրերը օգնում են մեզ հասկանալ, որ հոգեւոր կեանքի մէջ մօտենալով Տիրոջը՝ մօտենում ենք նաեւ մեր բոլոր եղբայրներին եւ քոյրերին ի Քրիստոս՝ ողջ տիեզերքի հետ ապրելով կատարեալ համերաշխութեան մէջ: Հաւատարմութիւնը հանդէպ Քրիստոսի եւ Նրա սրբութեան կոչին մեզ մշտապէս կ՚առաջնորդի դէպի աւելի ամուր միութիւն:

Քրիստոնեաների միութեան խթանման Քահանայապետական խորհուրդը լիայոյս է, որ այս նիւթերը պտղաբեր կը լինեն եւ կ'օգնեն քրիստոնեաներին էլ աւելի միաւորուել միմեանց հետ:

Թարգմանեց՝ Հրանուշ Սարգսեանը

22/06/2020, 09:31