Քաղդէացիներու պատրիարքը կոչ ըրաւ ընդառաջելու Իրաքցի ժողովուրդին պահանջներուն:
Վազգէն Աբարդեան - Վատիկան
Քաղդէացիներուն Պատրիարք Կարդինալ Լուիս Սաքօ, յղում կատարելով Ասիա Նիուզին, կոչ ըրած է Իրաքի քաղաքական պատասխանատուներուն, ունկնդրելու եւ ընդառաջելու ժողովուրդին պահանջներուն, նշելով որ Իրաքի ժողովուրդը դժգոհ է եւ թշուառ կացութեան մէջ կ՝ապրի՝ կաշառակերութեամբ եւ փտածութեամբ յատկանշուած կացութիւն:
Քաղդէացիներու պատրիարքը նշած է, որ ինք մօտէն կը հետեւի Իրաքի մէջ տիրող տագնապալի իրավիճակին, իր մտավախութիւնը յայտնելով այն գծով, որ յառաջիկայ օրերուն կրնայ կացութիւնը վատթարանալ :
«Իրաքի մէջ ծայր առած ցոյցերուն սկիզբէն ի վեր մեր եկեղեցիները կ՝աղօթեն երկրի վերականգման եւ կայունութեան համար :Նշած է Պատրիարքը, ու աւելցուցած , յառաջիկայ 25 հոկտեմբերին ինք մօտէն պիտի հետեւի բողոք ցոյցերուն:
Կոչին մէջ Քաղդէացիներուն Պատրիարքը նշած է նաեւ որ 2003 թուականէն ասդին, առաջին անգամուան համար ցուցարարները իրենց պահանջները ներկայացուցած են խաղաղ ձեւով եւ հեռու մնալով քաղաքական շահերէն: Ցուցարարները շրջանցելով համայնքային պատնէշները շեշտած են Իրաքեան հասարակաց ինքնութիւնը:
Այս իսկ պատճառաւ եկեղեցին զօրակից է Իր ժողովուրդին, կը զգայ անոնց ցաւն ու նեցուկ կը կանգնի անոնց աւելի լաւ ապագայ կերտելու ձգտումներուն:
Կարդինալ Լուիս Ռաֆայէլ Սաքօ ապա նկատել կու տայ, որ եկեղեցւոյ հրաւէրն է զարգացնել խաղաղ եւ բարեկիրթ ցոյցեր որ գիտեն յարգել հասարակաց բարիքը, եւ հեռու կը մնան ոտնձգութեան բոլոր ձեւերէն: Ան միաժամանակ հրաւէր ուղղած է իրաքի քաղաքական իշխանութիւններուն, որ իրենք եւս իրենց կարգին յարգեն ցոյց կատարելու ժողովուրդի իրաւունքները:
Կոչի աւարտին Քաղդէացիներուն պատրիարքը նշած է, որ սա է պահը, պատասխանատու հոգիով դիմագրաւելու կուտակուած հարցերը: .Պէտք է լուրջ երկխօսութեամբ որոնել պատրաստուած լուրջ անձեր՝ որոնք ճանչցուած են իրենց պարկեշտութեամբ եւ հայրենասիրութեամբ ու անոնց յանձնել Իրաքի գործերուն մատակարարումի պարտականութիւնը: ըսած է Քաղդէացիներուն պատրիարքը:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
