Ватыканская аптэка атрымала самае сучаснае абсталяванне
Былі заменены падлогі, столь і асвятленне. Усе прылаўкі абноўленай аптэкі цяпер будуць абслугоўвацца робатамі, што значна скароціць час для пошуку патрэбнага медыкамента і перадачы яго кліенту. Аўтаматызаваная сістэма BD Rowa павінна зрабіць сапраўдную рэвалюцыю ў лагістыцы, захоўванні і продажы лекаў.
На аптэчным складзе знаходзіцца больш за 40 тыс. прэпаратаў, фармацэўты штодня абслугоўваюць больш за 2 тыс. кліентаў. Пры гэтым персанал вельмі нешматлікі – усяго 65 чалавек. Цяпер аптэка ў цэлым займае плошчу ў 1 тыс. м.кв., куды ўваходзяць: гандлёвая зала, падземныя склады, офісы і касметычны аддзел.
І гэта не ўсе новаўвядзенні. У дадатак да аўтаматызацыі продажу, быў актываваны smartticket: дастаткова навесці тэлефон на QR-код на этікетцы леку, і на экране з’явіцца поўная інфармацыя аб ім.
Вітрыны ў аптэцы сталі віртуальнымі, што эканоміць месца ў памяшканні. З мэтай аптымізацыі прасторы былі ліквідаваны традыцыйныя пакупніцкія кошыкі.
Місія Ватыканскай аптэкі заключаецца ў садзейнічанні здароўю і сведчанні надзеі тым, хто пакутуе, - адзначаецца ў спецыяльным паведамленні структуры. Асаблівая ўвага тут удзяляецца прафесіяналізму фармацэўтаў, каб гарантаваць пацыенту атрыманне патрэбных лекаў у адпаведны час разам з прыдатнымі парадамі.
Яшчэ адзін інавацыйны элемент – увядзенне сістэмы ліквідацыі чэргаў у рэжыме рэальнага часу.
Рэканструкцыя аптэкі адбываецца не ўпершыню з моманту яе заснавання ў 1874 г., апошняя была праведзена ў 1989 г. Цяперашняе абнаўленне гандлёвай прасторы стала завяршальным акцэнтам перамен: у 2018 г. быў перабудаваны склад фармацэўтычнай установы, а ў 2019 г. – офісы і касметычны аддзел.
