Vatican News

Пантыфік: мірскія крытэрыі поспеху – не для Касцёла

Трэба штосьці рабіць, калі Касцёл пачынае ўспрымацца мірскім, падпарадкаваным свецкім крытэрыям поспеху, забывае, што існуе не для таго, каб абвяшчаць самога сябе, але Езуса, - упэўнены Папа.

Раніцай 21 верасня 2019 г. Францішак прыняў на аўдыенцыі ў Ватыкане ўдзельнікаў міжнароднай канферэнцыі на тэму новых шляхоў евангелізацыі, на якой сабраліся прадстаўнікі акадэмічных колаў, каталіцкіх рухаў і асацыяцый, даследчыкі, тэолагі і філосафы. Ініцыятарам форуму выступіла Папская рада па новай евангелізацыі.

Звяртаючыся да прысутных, Пантыфік заўважыў, што сёння вельмі многія людзі нагадваюць тых вучняў Хрыста, якія, сустрэўшы Езуса ў дзень Яго Уваскрасення па дарозе ў Эмаус, не распазналі Яго (пар. Лк 24, 13-27). Папа з сумам прызнаў, што для сучаснага чалавека Касцёл часта становіцца “халодным напамінам”, “пякучым расчараваннем”, нечым далёкім ад людскіх патрэб, няздольным зразумець.

“Касцёл, заклапочаны абаронай свайго добрага імя, якому цяжка адмовіцца ад таго, што не з’яўляецца сутнасным, больш не адчувае запалу прапаведаваць Евангелле ў сучасным свеце. І ператвараецца, хутчэй, у прыгожы музейны экспанат, чым у просты і святочны Дом Айца”

, - перасцярог Святы Айцец.

Ён заклікаў прысутных зважаць на тое, як шмат навокал братоў і сясцёр, якія заглушаюць душэўны боль выгодамі і знешнім дабрабытам, павярхоўнымі задавальненнямі, бясконцай спешкай. Яны “забыліся смак жыцця”: “прыгажосць вялікай і моцнай сям’і”, “бляск дзіцячых вачэй, якога не можа даць ніводзін смартфон”, “радасць простых рэчаў”, “супакой, які дорыць малітва”.

Яны чакаюць ад Касцёла прыняцця сябе такімі, якімі ёсць, яны шукаюць у ім любові, супакою для сэрца і радасці, больш трывалай за часовыя забавы, - сказаў Францішак. Ён дадаў, што трэба выходзіць насустрач сваім сучаснікам, каб даць ім зазнаць Божую любоў.

“Несці іншым Бога – не значыць казаць пра Бога, даказваць Яго існаванне: нават д’ябал ведае, што Бог існуе! Абвяшчаць Пана – значыць праяўляць радасць ад ведання Яго, дапамагаць перажываць прыгажосць сустрэчы з Ім. Бог – не адказ на інтэлектуальную цікаўнасць (...), але вопыт любові, пакліканы стаць гісторыяй любові, таму што, сустрэўшы Яго аднойчы, трэба шукаць Яго зноў і зноў. Таямніца Бога невычэрпная, яна бясконцая як Яго любоў”, - адзначыў Святы Айцец.

Нарэшце, Папа нагадаў прысутным, што ўзрастаць у веры, якая нараджаецца і адраджаецца ў сустрэчы з Езусам, дапамагае ўсё тое, што ўвасабляе сустрэчу: блізкасць да людзей у патрэбе, будаўніцтва мастоў, служэнне тым, хто пакутуе, клопат пра бедных, суцяшэнне прыгнечаных, благаслаўленне непрыяцеляў... “Толькі так можна стаць жывым знакам Любові, якую абвяшчаем”, - сказаў Францішак.

Навіна ў фармаце аўдыё
21 верасня 2019, 14:27