ስድራቤት ፍቅሪ እንመሃረሉን ካብ ገዛእ ርእስና እንወጸሉን ቦታ እዩ! ር.ሊ.ጳ

“ኩልኻትኩም ሰብሓዳር ስድራቤት እንክተቊሙ ብጸጋ ክርስቶስ ኢኹም ነዛ ተባዕ ምርጫ ዝገበርኩም፣ ሓርነትኩም ንግላዊ ጥቅምኹም ኣይትግበርዎ፣ ነቶም እግዚአብሔር ኣብ ጉድንኹም ዘቀመጠልኩም ሰባት ንምፍቃር ተጠቀሙሉ። ከም ደሴት በበይንኹም ምእንቲ ከይትነብሩ ኣብ ኣገልግሎት ሓድሕድ ጸሚድኩም። ሓርነት ኣብ ስድራቤት ብከምዚ እዩ ዝንበር! ስድራቤት በብዓለሞም በበይኖም ዝጐዓዙ ባእታት ወይ ሳተላይት ኣይኮኑን። ስድራቤት ቦታ ርክብ ቦታ ሱታፌ ኰይኑ ካብ ገዛእ ርእስኻ ወጺእካ ንካልኦት ንምቅባልን ኣብ ጐድኖም ንክትከውንን ዝዕድም እዩ። ስድራቤት ንምፍቃር እትመሃረሉ ቀዳማይ ቦታ እዩ። ነዚ ፈጺምኩም ኣይትረስዕዎ! ስድራቤት ንምፍቃር እትመሃረሉ ቀዳማይ ቦታ እዩ። ንሕይወት ዘሎኩም ወኒ ንደቅኹም ኣመሓላልፉሎም ኢሎም።”

“ወለዲ እግዚአብሔር ምስ መንእሰያት ከመይ ቢሉ ከምዝሰርሕ ከስትንትኑ ኣገዳሲ እዩ፣ እግዚአብሔር ንመንእሰያት የፍቅሮም እዩ በዚ ከኣ እዩ ካብ ብዙሕ ሓደጋን ፈተነን ስቃይን ዝሕልዎም፣ እግዚአብሔር ህውኽን ቅጥዒ ኣልቦ ተከላኻልን ኣይኮነን እኳ ደኣ ብኣንጻሩ ብኣኦም ይተኣማመን ከከም ዓቅሞም ከኣ ተልእኮ ይህቦም። ዝከበርኩም ወለዲ ቃል ኣምላኽ መንገዲ ይሕብረና ኣሎ። ንደቅኹም ካብ ጸገምን ስቃይን ክተድሕንዎም ጥራይ ዘይኮነ ወኒ ሕይወት ኣመሓላልፉሎም፣ ጸዋዕታኦም ፈሊጦም አግዚአብሔር ዝሓሰበሎም ዓቢ ተልእኮኦም ሃንጐፋይ ቢሎም ከምዝቅበሉ ግበርዎም። ንውሉድ ጸዋዕታኡ ክኽተል ካብ እተተባብዓሉን እትሕግዘሉን ዝበልጽ መንገዲ የሎን። ክንዮ ዘሎ ጸገማትን ዘሕዝን ግዝያት ፈተናን ወለዲ ንደቆም ብተኣማንነትን ትዕግስትን ከም ሓደ ተልእኮኦም ክምልከትዎም ካብ ምምርኣይ ዝበልጽ የሎን። ምስ ጐይታ እትገብሮ ጒዕዞ ወትሩ ኣንቀሳቃስን ኣደናቅን እዩ ኢሎም።”

“ንኢየሱስ ምስዓብ ማለት ወትሩ ኣብ ቀጻሊ ምንቅስቃስ ኢኻ ማለቱ እዩ፣ ኣብ ኩነታት ሕይወት ወትሩ ኣብ ጒዕዞ ማለት እዩ። ንሰብ ሓዳር እዚ ክሳብ ክንደይ ሓቂ እዩ፣ ንጸዋዕታ ሓዳር ተቀቢልኩም ጎጆኹም ገዲፍኩም መጻኢ እንታይ ምዃኑ ክትግምቱ ንዘይትኽእሉ ጒዕዞ ጀሚርኩም ኣብ ቀጻሊ ምንቅስቃስ ምስ ዘይተጸበኹምዎን ኣደናቅን ዝኾነ ነገራት ትጐዓዙ ኣሎኹም፣ ገሊ ካብ ዝጓነፈኩም ዘሕዝን ክኸውን ይኽእል። ምስ ጐይታ ጒዕዞኸስ ከምዚ እዩ። ወትሩ ትንቀሳቀስ ብሃንደበት ዘጋጥም ዘደንቅ ተረኽቦ እዩ። ስለዚ ንዝሓለፈ ከይናፈቅኩም ወትሩ ንቅሚት ምጥማት የድሊ ኢሎም።”

“ዝኸበርኩም ስድራቤታት ንስኹም እውን ካልእ ቀዳምነታት ከይህልወኩም ንድሕሪት ቊሊሕ ከይትብሉ ብዝሓለፈ ከይትበኽዩ ምስ ገበታ ሕልምታቱ ንዝነበረኩም ሓርነት ከይትናፍቁ ዋላ ንገዛኹም ደሓን ኩኒ ከይትብሉ ነዛ ሓዳስ ጸዋዕታ ኣምላኽ ክትቅበሉ ዝተዓደምኩም ኢኹም። ኢየሱስ ንሓዳር ንስድራቤት ክጽውዕ እንከሎ ንቅድሚት ክንጥምት ይሓተና ንሱ ኸኣ ቀቅደመና እናኸደ ኣብ ፍቅርን ኣገልግሎትን ይመርሓና። ዝስዕቦ ፈጺሙ ኣይፈሽልን እዩ፣ ቤተክርስትያን ከኣ ወትሩ ኣብ ጉድኑኹም ኣላ ኢሎም።”

“ንክትምርዖ ትብዓት የድሊ። ብዙሓት መንእሰያት ንክምርዓው ትብዓት ዘይብሎም ንርኢ፣ ብዙሕ ግዜ ኣደታት ‘ንዑባ ገለ ግበሩ ኣባ! ንወደይ ተዛረቡለይ፣ ከይተመርዓው 37 ዓመቱ ኰይኑ’ ዝብላ የጋጥማኒ እየን። ኣነ ኸኣ ‘እምበይተይ ክዳኑ ኣይተስታርሪ ባዕሉ ገለ ክገብር ደፋፍእዮ፣ ካብ ገዛ ከምዝወጽእ ግበሪ’ እብለን። ምኽንያቱ ከኣ ፍቅሪ ስድራቤት ንደቆም ርእሶም ክኢሎም ንምንባር ክደፋፍኦም ኣለዎ፣ ሓርነት የድሊ። ኣብ ግዜ ጸገም ግን ናብ ቤት ኣደ ክምለሱ ምትብባዖም የድሊ። ኣጆኹም ነዛ ትብዓት ዘድልያ ምርጫ ሰዓብዋ። ቤተክርስትያን ወትሩ ምሳኹም እያ። ጐይታ ዕለት ዕለት ሓድነትን ሰላምን ናይ ጽንዓት ታሕጓስን ይሃብኩም። በዚ ከኣ እግዚአብሔር ፍቅርን ሱታፌ ሕይወትን ምዃኑ ንምስካር የኽእልኩም ኢሎም።”