እንኮ ፈውሲ ሕይወት ፍቅሪ ጥራሕ እዩ/ ንካልኦት ኣይንፍረድ! ር.ሊ.ጳ

“እስኪ ኣብ ሕይወትና ምልስ ኢልና ኣብ ሕይወትና እቲ ዝዓበየ ሕማም እንታይ ኮን ይኸውን! ኢልና ንሕተት። መንሽሮ ወይ ካንሰርዶ ይኸውን! ሕማም ዓባይ ሰዓል ትዩበርክሎዚስዶ ይኸውን! ወይስ እዚ ናይ ዘመንና ለበዳ ኮቪድ 19! ናይ ኩለን መልሲ ኣይፋል እዩ። ኣብ ሕይወትና እቲ ዝዓበየ ሕማም ፍቅሪ ምስኣን ክተፍቅር እውን ዘይምኽኣል እዩ። እቲ ዝዓበየ ሕውየትከስ ካብ ስምዒታትካ እንክትፍወስ እዩ። ፍቅሪ ኣይሽየጥ ኣይልወጥ ጸጋ እዩ ኢሎም።”

“ብዙሕ ግዜ ዝስዕረና ሓሳብ ዕውታት ምዃንን ገንዘብን ዘሐጒሱና ይመስለና። ፍቅሪ ኣይዕደግን እዩ። ብነጻ እዩ ዝዕደል። ኣብ ሕልናን ኰይኑ ኣብ ዘዕገርግር ሓሳብ ክንሕባእ ንፍትን እንተኾነ ፍቅሪ ኣብ ጭቡጥ ተግባር እዩ ዝግለጽ። ከምዘሎናዮ ንገዛእ ርእስና ክንቅብሎ ንጽገም ነቲ ብደገደገ ክንጸባበቅ ብእንገብሮ ነገራት ክንሕባእ ንፍትን እንተኾነ ፍቅሪ ብደገ ዝረኤ መጸባበቂ ኣይኮነን። ካብ ጠንቆልትን ፈለጥን እንብሎም ፍታሓት ሃሰስ ንብል። ደሓር ግን ገንዘብና ኩሉ ምስ ወዳእና ከምታ ሰበይቲ ብዘይ ገንዘብን ብዘይ ሰላምን ንተርርፍ። ንክንሓውኸስ እታ ተድልየና ልብና ንኢየሱስ ምኽፋት ጥራይ እዩ።”

“ምናዳ ኣብዚ ግዜ እዚ ምትንካብ ርክብ ምፍጣር ክሳብ ክንደይ ኣድላዩ ከምዝኾነ ኣጸቢቁ ተሰቊሩና ኣሎ። ምስ ኢየሱስ ከኣ ክንተናኸፍ ክንራኸብ ኣሎና። ሓንሳእ ሓንሳእ ሓንቲ ጽብቅቲ ሓሳብ ጸሎት ንረክብ እሞ ከም ሕንጻይ ወይ ፓፓጋሎ ንዓዓ ደጋግምን ክንጽሊ ንውዕል። እንተኾነ ጐይታ ክንረኽቦ ልብና ክንከፍተሉ ከምታ ናይታ ደም ዝፈሳ ዝነበረ ሰበይቲ ዘፈር ክዳኑ ብምትንካፍ ክንሓዊ እዩ ዝጽበየና ዘሎ። ምኽንያቱ ከኣ ምስ ኢየሱስ እንክንራኸብ ካብ ስምዒታትና ብኡ ንብኡ ኢና እንሓዊ። ስለዚ ክንዮ ቅድመ ኩነታዊ ፍርድን ዘይኮናዮ ኰና ክንረኤ ሒዂ ምባልን ምኻድ የድልየና ኢሎም።”

“ኢየሱስ ነቲ ፍጻሜ ከምቲ ንሕና እንገብሮ ብኣልማማ ብሓፈሻ ኣይኮነን ዝጥምቶ እንታይ ደኣ ነቲ በዓል ጉዳይ ብኣካል ይጥምት። ኣብቲ ዝረኤ ቊስልታትን ሕሉፍ ጌጋታትን ጠጠው ኣይብልን እንታይ ደኣ ክንዮ ሓጢኣትን ቅድመ ኩነታዊ ፍርድታትን ይሰግር። ክንደይ ግዜ ኮን ይኸውን ንሕና እንክንዛረብ ብኡ ንብኡ ኣብ ቤላቤለው ወዲቅና ብዛዕባ ብጾትና ሕማቅ ንዛረብን ንሓምን! ከምቲ ኢየሱስ ንድሕነትና ዝተግህ ዘይኮነ ኣየኸ እዚ ሰብ እዚ እሞ ረኣዮ ንብል። እንተ ኢየሱስ ናይ ሎሚ ሃረርታናን ድላይናን እምበር ነቲ ዘሎና ሕማቅ ታሪኽ ኣይኮነን ዝጥምት። ኢየሱስ ክንዮ ሓጢኣት ይሰግር። ኢየሱስ ክንዮ ቅድመ ኩነታዊ ፍርዲ ይሓልፍ። ኣብ ኣፍኣዊ ገጽታ ኣይቀውምን ናብ ልቢ እዩ ዝበጽሕ። በዚ ከኣ ነታ ብኩሎም ዝተናዕቀት ሰበይቲ የሕውያ። ፍቅሪ ብዝመልኦ አንደበት ከኣ ጓለይ ይብላ እሞ እምነትኪ ኣሕውያትኪ ብሰላም ኪዲ ካብ ሕማምኪ እውን ተፈወሲ ኢሉ የሰናብታ። ኢየሱስከስ ብተነጽሎ ንብሕቶም ዝሳቀዩን ዝቈሰሉን ይቅበል ንሕና እውን ከምቲ ናቱ ንዝቈሰሉን በይኖም ንዝኾኑን ሰባት ንቀበል ኢሎም።”

“ኢየሱስ ነቲ ፍጻሜ ከምቲ ንሕና እንገብሮ ብኣልማማ ብሓፈሻ ኣይኮነን ዝጥምቶ እንታይ ደኣ ነቲ በዓል ጉዳይ ብኣካል ይጥምት። ኣብቲ ዝረኤ ቊስልታትን ሕሉፍ ጌጋታትን ጠጠው ኣይብልን እንታይ ደኣ ክንዮ ሓጢኣትን ቅድመ ኩነታዊ ፍርድታትን ይሰግር። ክንደይ ግዜ ኮን ይኸውን ንሕና እንክንዛረብ ብኡ ንብኡ ኣብ ቤላቤለው ወዲቅና ብዛዕባ ብጾትና ሕማቅ ንዛረብን ንሓምን! ከምቲ ኢየሱስ ንድሕነትና ዝተግህ ዘይኮነ ኢየሱስ ኣብ ደጋዊ ኩነታት ሰባት ደው ዝብል ጠመተ ኣይሃሉኻ ይብለና። እንታይ ደኣ ናብ ልቢ ዝበጽሕ ዘይከስስን ዘይፈርድን ጠመተ ኰይኑ ሃንጐፋይ ኢሉ ዝቅበል ጠመተ ይሃሉኻ ይብለና። ደጊምከስ ንካልኦት ምፍራድ ወጊድ ንበሎ። ምኽንያቱ ከኣ ፍቅሪ ጥራሕ እዩ ንሕይወት ዘጥዒ። ኣይትፍረድ። ንግላውን ማሕበራውን ኩነታት ካልኦት ኣይትፍረድ። እግዚአብሔር ንኩልና የፍቅር። ኣይትፍረድ። ንካልኦት ብሰላም ክነብሩ ግደፍዎም ብፍቅሪ ክትቀርብዎም ከኣ ጸዓሩ ምስ በሉ ጸሎተ መልአከ እግዚአብሔር ደጊሞም።”