ቀንዲ ትርጉም ጾመ አርባዓ ልብኻ ንርሕራሔ ጐይታ ምኽፋት እዩ! ር.ሊ.ጳ

ዜና ቫቲካን!

ላቲናዊ ሥርዓተ ኣምልኾ እትኽተል ካቶሊካዊት ቤተ ክርስትያን ድሮ ራብዓይ ሰንበት ዘመነ ጾመ አርባዓ ብምብጻሓ ከምቲ ናትና ሰንበት ዘኒቆዲሞስ እንብሎ ናይ ዕለቱ ወንጌል ኣብ ዘተ ኒቆዲሞስን ኢየሱስን ዘተኮረ ካብ ዮሓ 3.16 ዝተወስደ ኰይኑ በቲ እግዚአብሔር ዝገለጸልና ፍቅሪ ንሓዱ ወዱ በጃ ክሳብ ምሃብ ዝገለጸልና ፍቅሪ ክንሕጐስ ነቲ ንሱ ዘተስፈወና ድሕነት ክንቅበል ዝዕድም ነበረ። ከመይ ነቶም ዝተቀበልዎ ዘለዓለማዊ ሕይወት መሰል ውሉድነት ስለዘልብሶም። እዚ ከኣ ንነፍሲወከፍ ኣማኒ ክርስትያን ደስ ዘብል ስለዝኾነ ሰንበት ናይ ታሕጓስ ዝብል ስም እውን ይወሃቦ።

እግዚአብሔር ንወዱ ስለኩልና ኣወፈዮ!

ጉዳይ ድሕነቱን ድሕነት ድኹምን ሓጢኣተኛን መላእ ዘመደ ኣዳምን ዘሻቀሎ ዓቢ ምሁር ኣይሁዳውያን ዝነበረ ኒቆዲሞስ ብስቱር ናብ ኢየሱስ ከይዱ እስኪ ንገረኒ መንገዲ ሓብረኒ ቀትሪ ከይመጽእ ሓፊረ ብዝዓይነቱ ቋንቋ ናብ ኢየሱስ ብለይቲ ጸልማት ተጐልቢቡ ብምኻድ ነቲ ኩሉ ነቢያት ዝበልዎ ዘማላእ ንኩሉ ምልክታት ሕቶ መሲሕ ዝምልስ ናይ እግዚአብሔር ሰብ ምዃኑ ንምምስካር ዚኣክል ከኣ ካብ ላዕሊ መምህር ኰንካ ከምዝመጻእካ ንኣምን ኢና እንተኾነ ዘይበርሃለይ ነገራት ኣሎ እሞ ኣብርሃለይ ክብል ምሥጢረ ድሕነት ክርዳእ ነቲ ኣብ ልቢ ነፍሲወከፍ ዘመደ ኣዳም ክሳብ ለይቲ ሎሚ ዘዕገርግር ሕቶ ክንዲ ገዛእ ርእሱን ክንዳናን ኰይኑ ሓተተ።

ርግጽ ኒቆዲሞስ ከም ኩሎም ምምጻእ መሲሕ ይጽበ ነበረ። እዚ ትጽቢት እዚ ኣብ ልቢ ደቂሰባት ሳዕሪሩስ ሎሚ እውን ብዙሓት ክንዲ ኣብ ህልው ዝነብሩ መጻኢ እናተጸበዩ ካብ ዝነብሩ ጀሚርካ ክሳብ እቶም ክሳብ ለይቲ ሎሚ ገና መሲሕ ክመጽእ እዩ ኢሎም ዝጽበዩ ዘለው ኣይሁድ ምጥቃስ ይከኣል። እንተኾነ ኢየሱስ ኣሕጽር ኣቢሉ እቲ ዝዓበየ ፍቅሪ እግዚአብሔር ክሳብ ንወዱ በጃ ምሃብ ከምዝበጽሐ በዚ ከኣ እቲ ዝተቀበሎን ዝኣመኖን ክድሕን እንተ እቲ ዘይኣምን ግን ንብርሃን ክርስቶስ ክቅበለሉ ዘይደልየሉ ምኽንያት ክፍኣተ ግብሪ ስለዝወረሶ ንጸልማት ስለ ዝሓረየ ባዕሉ ንገዛእ ርእሱ ከምዝኰነነ ይገልጸሉ።

ትጽቢት ኒቆዲሞስ ዝነበረ ‘ሓደ ሓያል መሲሕ መጺኡ ነዚ ዓለምና ብዓቢ ሓይልን ሥልጣንን ክፈርዶ ምዃኑ’ እዩ ዝነበረ። እንተ ኢየሱስ ነዚ ትጽቢት እዚ ሠለስተ ቀንዲ ነገራት ብምቅራብ ኣብ ቅልውላው የውድቆ። ቀዳማይ ወዲሰብ ኣብ መስቀል ተሰቂሉ ክኸብር ምዃኑ ካልኣይ ወዲሰብ ናብ ዓለም ዝተላእኮ ዓለም ብኣኡ ምእንቲ ክድሕን ምዃኑ ብሣልሳይ ደረጃ ከኣ ብርሃን ንመንገዲ ሓቅን ሓሶትን ስለዝፈሊ ምርጫ ደቂሰባት ወሳኒ ምዃኑ ከመይ እቶም ገበርቲ እከይ ግብሮም ምእንቲ ከይረኤ ጸልማት ከምዝመርጹ እቶም ደቂ ብርሃን ግን ግብሮም ምስክርነቶም ንባዕሉ ብርሃን ከምዝኾነ ንጹር ትምህርቲ ይህቦ ነቲ መምህር ኣይሁድ ዝኾነ ሊቅ ኒቆዲሞስ።

ኢየሱስ ኣብ መስቀል ከበረ!

እቲ ንኦሪትን ነቢያትን ፍጽምና ክህብ ዝመጸ ክርስቶስ ንምሁር ኣይሁድ ኒቆዲሞስ በቲ ንሱ ዝርድኦ ቋንቋ ማለት ካብ ቅዱስ መጽሓፍ እናጠቀሰ እቲ ብኣምሳልን ትንቢትን ኣብ ኦሪት ዝቀረበ ብምጽኣት ኢየሱስ ክርስቶስ ምልኣት ከምዝረክብ ንምግላጽ ከምቲ ሙሴ ኣብ በረኻ ንተመን ኣስራዚ ኣብ ባላ ዝሰቀሎ ወዲሰብ እውን ኣብ ዕጸ መስቀል ተሰቂሉ ብጃ ኩሉ ኪሓልፍ እሞ ኣብ ክብሩ ገሊጹ ንኩሎም ከኣ ናብኡ ክስሕቦም ምዃኑ ይገልጸሉ።

ከምቲ ኣብ ኦሪት እቶም ብምጒርምራሞምን ምጥርጣራቶምን መርዛማት ኣትማን ዝዓደሙ እስራኤላውን ብኣማልድነት ሙሴ ካብ መርዚ እቶም ኣትማን ብምጥማት ጥራይ ዘድሕን ብኣሥራዚ ዝተሰርሐ ምስሊ ተመን ኣብ ባላ ብምጥማት ጥራይ ካብ ቀታሊ መርዚ ዝድሕኑ ዝነበሩ ወዲሰብ እውን ኣብ መስቀል ተሰቂሉ እቲ ብኣኡ ዚኣምን ዘበለ ካብ መርዚ ሓጢኣት ሓውዩ ሕይወት ከምዝረክብ ገበረ። ተልእኮ ኢየሱስ ድሕነት ኩሉ ዘመደ ኣዳም ምዃኑ ገለጸሉ።

ተልእኮ ኢየሱስ ድሕነት ኩልና እዩ!

ታሪኽ ድሕነት ዘመደ ኣዳም ብሰፊሑ ኣብ ቅዱስ መጽሓፍ ተገሊጹ ከምዘሎ ዝለዓለ መግለጺኡ እግዚአብሔር ነቲ እንኮ ወዱ ስለድሕነት ዓለም ምውፋዩ እዩ።

ኢየሱስ ብርሃን እዩ!

ካብቲ ንኢየሱስ ዝወሃብ ኣስማት ብሳልሳይ ደረጃ ዝቀርብ ብርሃን እዩ። ብርሃን ናብ ዓለም መጸ እንክብል ከኣ ብወገን ኣምላኽ ኩሉ ከምዝተገብረን እቲ ምርጫ ንዘመደ ኣዳም ከምዝተዋህበን ይገልጽ። እቲ ምርጫኸስ ንመንገዲ ብርሃን ወይውን ነታ ኣንጻራ ዝኾነት መንገዲ ጸልማት ምምራጽ እዩ።

ኣብ ምሕረት ሓቀኛ ታሕጓስ ኣሎ!

ቅዱስነቶም ኣብ ፍጻሜ ኣስተምህሮኦም ኣብታ ንሾመንተ ዓመት ምስ መመላእታ ዝደጋገምዋ ቤተክርስትያን እውን ንልዕሊ ክልተ ሺሕ ዓመት ዝሰበኸታ ኢየሱስን ኩሎም ቅዱሳት ጽሑፋትን እውን ዘጋውሕዋ መልእኽቲ ምሕረት ኣምላኽ ምልስ ይብሉ እሞ ዕብየት ፍቅሪ እግዚአብሔር ብምሕረቱ ከምዝግለጽ እዚ ከኣ ሓቀኛ ታሕጓስ ዝዕድል ፍጻሜ ኰይኑ ንልባትና ናብቲ መወዳእታ ዘይብሉ ፍቅሪ ኣምላኽ ከፊትና ነቲ ብርሕራሔ ዝመልአ ምሕረትን ሕያውነቱን ኣብዚ ምሩጽ ግዜ ዘመነ ጾመ ኣርባዓ ንብርሃን ክርስቶስ ኣብ ሕልናና ብምቅባል ነስተማቅሮ እንክብሉ ከምቲ ደጋጊሞም ዝበልዎ ምሕረት ኣምላኽ ወትሩ ስንድው ከምዝኾነ ከምዚ ክብሉ ገሊጾም።

ንኩሉ ጸገማትና ናብ ኢየሱስ ክንወፊ ከምዘሎና ብምንም ክንጭነቅ ከምዘይብልና ነዚ ካብዚ ሒዙና ዘሎ ቅልውላው ጥዕና ምእንቲ ክንሓውን ሓጐስና ምሉእ ምእንቲ ክኸውንን ንእኖና ድንግል ማርያም ከማልደልና ንለምና ድሕሪ ቢሎም ጸሎተ መልአከ እግዚአብሔር ደጊሞም።