እግዚአብሔር ክፉትን ምሕረት ዝመልኦን ልቢ ክህልወና ይደሊ! ር.ሊ.ጳ

“ፍቃድ ጐይታ ኩሉ ግዜ ርሕራሔን ምሕረትን እዩ። ‘ምሕረት እምበር መሥዋዕቲ ኣይደልን’ ይብል። ርሕራሔን ምሕረትን ዘይብሉ ልቢ ናብ ኣምልኾ ጣዖት ገጹ ዘምርሕ ርእስኻ ናብ ምኽኣል ወሲዱ በቲ ንዓይ ጥራይ ዝብል መፈስ ከምዝዕብለል ገሩ ኣብ ናይ ሥነ ሓሳብ ራእይ ዓለም ይወስደና። ነቶም ኣብ ግዜ ኢየሱስ ዝነበሩ ኣርባዕተ ሥነ ሓሳብ ራእይ ዓለም ዝነበሮም እሞ ንመልከት። ፈሪሳውያን ሰዱቃውያንን ኤሰንስን ቀናኣት ኣይሁድን ንሕሰብ። ኣርባዕቲኦም ናይ እግዚአብሔር ዘይኮነ መደባት ሒዞም ልባታቶም ኣትሪሮም ዝነበሩ ብምንባሮም ርሕራሔን ምሕረትን ኣይነበሮምን። ነዚ ከምዚ ዚኣመሰለ ልቢ ገኒሑ ዘለስልስ ኢየሱስ እዩ።”

“ልብና ምስ ተረረ ልብና ምስ ነቀጸ ይርስዕ። ነቲ ዝተዓደሎ ጸጋ ድሕነት ይርስዕ። ንኩሉ ትዕድልታት ይርስዕ። ሽዑ እንታይ ዝገበርካለይ ኢኻ ኢሉ ኣብ ባእስን ውግእን ይኣቱ። ባዕለይ እየ ኣነ እየ ክብል ናብ ኣነነት ወዲቁ ንሓው የዕኑ። ከመይ ብኡ ንብኡ ርሕራሔ የጥፍእ። እቲ ዝዓበየ መልእኽቲ ድሕነት እቲ እግዚአብሔር ኣባና ዘርኣዮ ርሕራሔን ምሕረትን እዩ። ኣብ ወንጌል ኣብ ዝተፈላለየ ክፍልታት ኢየሱስ ጽጉም ሕሙም ዝሳቀ ክርኢ እንከሎ ‘ራሕሪሑሉ’ ዝብል ቃልከስ ኢየሱስ ናይእግዚአብሔር ኣቦ ርሕራሔ ከምዝኾነ የመልክት።”

“[ ነፍሲ ወከፍና ኣብ ልብና ገለ ትርር ዝበለ ነገር ኣሎና። ንዝኽርና ነበራብር ጐይታ ክፉትን ንጹሕን ልቢ ክህበና ንለምኖ። ሽዑ ልብና ማሕደር ጐይታ ክኸውን እዩ። ከመይ ጐይታ ናብ ተሪር ልቢ ኣይኣቱን ብሥነ ሓሳብ ራእይ ዓለም ናብ ዝተሓዝአ ልቢ ኣይኣቱን። ጐይታ ዝሓድሮ ልቢ ከምቲ ልቡ የዋህን ትሑትን ርሕሩሕን ክፉትን ኣብ ዝኽዕነ ልቢ እዩ። ጐይታ ነዚ ጸጋ እዚ ይዓድለና። ] ”