ናይ መን ኢና᎒ ናይ ክርስቶስዶ ናይ ዓለም᎒ ኣምላኽ በታ ዝፈረድናያ ክፈርደና እዩ! ር.ሊ.ጳ

“ጐይታ ኣብቲ ዕለት እቲ ንካልኦት በየናይ መስፈር ሰፊርካሎም! ንገዛእ ርእስኻኸ ኣየናይ መስፈር ትጥቀም ነርካ! እታ ዝተጠቀምካላ መስፈር ልግሲ ነርዋዶ ፍቅሪኸ ኣኽል ታርፍዶ ነርዋ! ወይ ገለ ዝጐደሎ ነሩ! ክብለና እዩ። ከመይ በታ መስፈር እምበር ብካልእ ኣይኮናን እንፍረድ! በታ ሎሚ እንገብራ ኢና እንፍረድ። ክመዝን እንከሎኹ ኣልዕልዶ ኣቢለ ነረ ኣትሕት! ካብ ሕጂ ነዚ ነስተንትን። ነዚ ነገራት እዚ ኣብቲ ጽቡቕ እንገብሮ ጥራይ ኣይኮነን ክንጸባጽቦ ኣብቲ እንፍጽሞ ሕማቅ ነገራትን እንነብሮ ቅዲ ሕይወትን መነባብሮን ከይትረፈ ክጽብጸብ እዩ። መሪሕ ቅዲ ሕይወትናን መነባብሮናን ክኸውን ዘለዎ እቲ ንገዛእ ርእሱ ምእንታና ክብል ከም ኢምንት ዝገበረ ቅዲ ሕይወት ጐይታ እዩ።”

“ከም ክርስትያን ክሓትት ከሎኹ ኣየነይቲ ኮን ትኸውን እታ እምኒ ኲርናዕ ኰይና ንኩሉ ብኣኣ ዝመዝነላ እታ ኢየሱስ ዝደልያዶ ኾን ትኸውን! እብል። ትሕት ኢለ ትሕትና ተላቢሰ ክመላለስ እኽእልዶ! ካልኦት ከዋርዱኒ ብትሕትናዶ እቅበሎ። ኣብ ሕይወት ንዘጋጥሙ ውርድታት ብትሕትና ዘይቅበል ክርስትያን ገለ ዝጐደሎ ነገር ኣለዎ። እዚ ወይ ልቅሉቅ መቃብር ወይውን ንጥቅሙ ጥራይ ዘቀድም ክርስትያን እዩ። ምናልባት ሓደ ካባኹም እዚ ከመይ ኢሉ ይኸውን ኣባቴ ክብለኒ ይኽእል። ኣነኸኣ ኢየሱስ ምእታኻ ክብል ኢምንት ኰይኑ ከምቲ ቅዱስ ጳውሎስ ዝብሎ ‘ክሳብ ሞት ንታሕቲ ወረደ ሞት ብሞቱ ከኣ ኣብ ልዕሊ መስቀል ተሰቂሉ ሞተ’ እዚ ኩሉ ከኣ ምእንታና እዩ እብሎ። ንሱ ኣምላኽ ነበረ ግን ኣነ ኣምላኽ እየ ቦታይ ኣይለቅቅን ኣይበለን ብትሕትና ንገዛእ ርእሱ ከም ኢምንት ገበረ። ክንክተሎ ዘሎ ኣብነትከስ እዚ እዩ።”

“በታ ዝሰፈርኩምላ መስፈር ኪስፈረልኩም እዩ እትብል ቃልከስ ንቃል ንቃላ እያ። ክርስትያናዊ መስፈር እንተዀይኑ እሞ ከኣ ንክርስቶስ ኣብ ሕይወቱ ዝኽተል እንተዀይኑ ብምግባረ ሠናይን ፍቅርን ምሕረትን ዝሰፍር እንተዀይኑ ከምኣ ክትስፈረሉ እያ። እታ መስፈር ብእምነት ክርስትና ተሸፊና ዓለማዊ ነገራት እንተለዋ ማለት ቅዳሴ እኸይድ ትብል ኰይኑ ከም ሓደ ኣረሜን ትነብር እንተዀንካ ከምኣ ክተጋጥመካ እያ። ንጐይታኸስ ከም ክርስትያን እንነብረሉ ጸጋ ክዕድለና ልዕሊ ኩሉ ንመስቀልን ንውርደትን ከይንፈርህ ከመይ ንከድሕነና ዝመረጻ መንገዲ ንሳ ስለዝኾነት ማለት መንገዲ ትሕትናን መስቀልን ስለዝኾነት ውሕስነትና እዚኣ እያ። መስቀልና ጸርና ንዝመጸና ውርደት ብትሕትና ክንቅበል ንክንክእል ጸጋኡ ክህበና ንለምኖ።”