திருத்தந்தையின் 37வது வெளிநாட்டுத் திருத்தூதுப் பயணம்

மேரி தெரேசா: வத்திக்கான்

திருத்தந்தை பிரான்சிஸ் அவர்கள், தனது 37வது வெளிநாட்டுத் திருத்தூதுப் பயணத்தை, ஜூலை 24, இஞ்ஞாயிறு உள்ளூர் நேரம் காலை 8.10 மணிக்கு வத்திக்கானில் தான் தங்கியிருக்கும் சாந்தா மார்த்தா இல்லத்திலிருந்து தொடங்கினார். ஒரு வெளிநாட்டுத் திருத்தூதுப் பயணத்தை தொடங்குவதற்கு முன்பும், அதை முடித்துத் திரும்பும்போதும், உரோம் மேரி மேஜர் அன்னை மரியா பெருங்கோவில் சென்று அவ்வன்னையிடம் அப்பயணத்தை அர்ப்பணித்து செபிக்கும் பழக்கத்தைக் கொண்டிருக்கிறார் திருத்தந்தை. “ஒன்றிணைந்து நடப்போம்” என்ற தலைப்பில் நடைபெறும் 37வது வெளிநாட்டுத் திருத்தூதுப் பயணமாகிய, கனடா நாட்டுக்குத் திருத்தூதுப் பயணத்தைத் தொடங்குவதற்கு முன்னரும் அந்த பழக்கத்தை திருத்தந்தை நிறுத்திவிடவில்லை. சாந்தா மார்த்தா இல்லத்தில் தன்னை வழியனுப்ப வந்திருந்த சில வறியோர் மற்றும் பலருக்கு வாழ்த்துச் சொல்லி, உரோம் பிஃயூமிச்சினோ பன்னாட்டு விமான நிலையத்திற்கு காரில் சென்று, இஞ்ஞாயிறு காலை 9.16 மணிக்கு ITA A330 இத்தாலிய விமானத்தில் கனடா நாட்டின் எட்மன்டன் பன்னாட்டு விமான நிலையம் நோக்கிப் புறப்பட்டார் திருத்தந்தை பிரான்சிஸ். ஏறத்தாழ பத்து மணி 30 நிமிடங்கள் விமானப் பயணத்தை மேற்கொண்டு கனடாவின் எட்மன்டன் நகரின் பன்னாட்டு விமான நிலையத்தை, உள்ளூர் நேரம் இஞ்ஞாயிறு பகல் 11.09 மணிக்குச் சென்றடைந்தார் திருத்தந்தை. அப்போது இந்திய இலங்கை நேரம் இஞ்ஞாயிறு இரவு 10 மணி 39 நிமிடங்களாக இருந்தன.

இந்நீண்ட பயணத்தில் தான் கடந்துசென்ற, இத்தாலி, சுவிட்சர்லாந்து, பிரான்ஸ், பிரித்தானியா, ஐஸ்லாந்து, கிரீன்லாந்து, டென்மார்க் ஆகிய நாடுகளின் அரசுத்தலைவர்களுக்கு இறைவேண்டல், ஆசிருடன்கூடிய நல்வாழ்த்துத் தந்திச் செய்திகளை அனுப்பினார் திருத்தந்தை பிரான்சிஸ். இத்திருத்தூதுப் பயணம் குறித்த செய்திகளை சுடச்சுட வெளியிடுவதற்காக, தன்னோடு பயணம் செய்த ஏறத்தாழ எண்பது பன்னாட்டு செய்தியாளர்களையும் திருத்தந்தை வாழ்த்துவதற்குத் தவறவில்லை. திருத்தந்தையின் உடல்நலம் கருதி, அவரோடு ஒரு மருத்துவரும், செவிலியரும் சென்றனர். திருத்தந்தை பிரான்சிஸ் அவர்கள், திருத்தூதுப் பயண நிகழ்வுகளை முதலில் தொடங்கும் கனடாவின் எட்மன்டன் நகருக்கும், இந்தியா-இலங்கைக்கும் இடைப்பட்ட கால இடைவெளி 14 மணி நேரங்களாகும்.

தவத் திருப்பயணம்

திருத்தந்தையின் 37வது வெளிநாட்டுத் திருத்தூதுப் பயணம், ஒரு தவத் திருப்பயணமாக அமைந்துள்ளது. வட அமெரிக்காவிலுள்ள கனடாவின் பூர்வீக இன மக்களுக்கு, கடந்த காலத்தில், குறிப்பாக கிறிஸ்தவ சபைகளால் இழைக்கப்பட்ட அநீதிகளுக்கு மன்னிப்புக் கேட்கவும், அவற்றால் அவர்கள் அடைந்த மனப்புண்களைக் குணப்படுத்தவும், அம்மக்களோடு தான் கொண்டிருக்கும் நெருக்கத்தை வெளிப்படுத்தவும், ஒரு தவப் பயணத்தை திருத்தந்தை கனடா நாட்டில் மேற்கொள்கிறார். திருத்தந்தை பிரான்சிஸ் அவர்கள், தனது தலைமைப் பணியில் திருத்தூதுப் பயணத்தை மேற்கொண்டுள்ள 56வது நாடாக கனடாவுக்கு அவர் சென்றுள்ளார். 1984, 1987, 2002 ஆகிய ஆண்டுகளில் மூன்று முறை கனடாவுக்குத் திருத்தூதுப் பயணங்களை மேற்கொண்ட திருத்தந்தை புனித 2ம் யோவான் பவுல் அவர்களின் அடிச்சுவடுகளைப் பின்பற்றி, இந்த 37வது வெளிநாட்டுத் திருத்தூதுப் பயணத்தைத் தொடங்கியுள்ள திருத்தந்தை பிரான்சிஸ் அவர்கள், எட்மன்டன் நகரை உள்ளூர் நேரம் பகல் 11 மணி 20 நிமிடங்களுக்குச் சென்றடைகிறார். அப்போது இந்திய-இலங்கை நேரம் இஞ்ஞாயிறு இரவு 10 மணி, 50 நிமிடங்களாக இருக்கின்றது.

எட்மன்டன் பன்னாட்டு விமான நிலையத்தில் கனடாவின் ஆளுனர், பிரதமர் உட்பட முக்கிய அரசு மற்றும், திருஅவைத் தலைவர்கள் திருத்தந்தையை வரவேற்கின்றனர். பின்னர் அங்கிருந்து 31.3 கிலோ மீட்டர் தொலைவிலுள்ள அந்நகரின் புனித யோசேப்பு அருள்பணித்துவ பயிற்சிக் கல்லூரி சென்று இரவு உணவருந்தி ஓய்வெடுக்கிறார் திருத்தந்தை பிரான்சிஸ். இந்த 37வது வெளிநாட்டுப் பயண நிகழ்வுகள் ஜூலை 25 திங்களன்று தொடங்குகின்றன. இந்நாளில் Maskwacis நகருக்குக் காரில் சென்று, First Nations, Me'tis, Inuit ஆகிய பூர்வீக இன மக்களைச் சந்திப்பார் திருத்தந்தை பிரான்சிஸ். 1884, 1885ம் ஆண்டுகளில் இப்பகுதியில் கத்தோலிக்க மறைப்பணித்தளத்தை மீண்டும் உருவாக்க முயற்சித்தபோது, அருள்பணி Constantine Scollen அவர்கள், இந்நகரை "கரடியின் குன்றுகள்" என்றே எப்போதும் அழைத்தார் என்று சொல்லப்படுகிறது. மேலும், ஜூலை 24, ஞாயிறு தாத்தாக்கள் பாட்டிகள், மற்றும் முதியோர் இரண்டாவது உலக நாளாகையால், அன்று கனடாவின் Quebec நகரிலுள்ள புனித அன்னா திருத்தலம் சென்று திருத்தந்தை செபிப்பார். அத்திருத்தலத்தில் அமெரிக்க பூர்வீக இனத்தைச் சார்ந்த புனித Kateri Tekakwitha திருவுருவத்தை அர்ச்சிப்பார். இவரே முதல் அமெரிக்க பூர்வீக இனப் புனிதராவார். இத்திருத்தூதுப் பயணத்தில், கனடாவின் Edmonton, Quebec, Iqaluit ஆகிய நகரங்களில் பயண நிகழ்வுகளை நிறைவேற்றுவார், திருத்தந்தை பிரான்சிஸ்.

கனடா திருத்தூதுப் பயணம்

கனடாவின் வரலாறு

கனடா என்பதற்கு, கிராமம், அல்லது குடியேற்றம் என்ற அர்த்தமாகும். 16ம் நூற்றாண்டு முதல், 18ம் நூற்றாண்டின் துவக்கம் வரை, "கனடா" என்பது, புனித இலாரன்ஸ் ஆற்றுப் பகுதியில் அமைந்துள்ள New Franceன் ஒரு பகுதியாகவே கருதப்பட்டது. பின்னர் 1791ஆம் ஆண்டில், அந்தப் பகுதி இரு பிரித்தானிய காலனிகளாக, மேல் கனடா, கீழ் கனடா என அழைக்கப்பட்டது. பின்னர் 1841ஆம் ஆண்டில் இவ்விரு காலனிகளும், கனடாவின் பிரித்தானிய ஒன்றியமாக, கனடா என அழைக்கப்பட்டது. 1867ஆம் ஆண்டில் இலண்டன் கருத்தரங்கில் இந்நாடு, கனடா என்ற பெயரை சட்டப்படி பெற்றது. 1982ம் ஆண்டில் இயற்றப்பட்ட கனடா அரசியலமைப்பின்படி, கனடா என்ற பெயர் அந்நாட்டிற்கு மட்டும் உரியதாக மாறியது.

16ம் நூற்றாண்டில் பிரித்தானிய மற்றும், பிரெஞ்சு நாடுகாண் பயணிகள், கனடாவைக் கண்டுபிடித்தனர். பின்னர் அவர்கள், அட்லாண்டிக் பெருங்கடலின் கரையோரம் தங்களின் குடியேற்றத்தை அமைத்தனர். பல்வேறு ஆயுதம் ஏந்திய போர்களின் விளைவாக, 1763ம் ஆண்டில், வட அமெரிக்காவில் பிரான்ஸ் நாடு, அதன் ஏறத்தாழ எல்லாக் காலனிகளையும் விட்டுக்கொடுத்துவிட்டது. 1867ம் ஆண்டில், கூட்டாட்சி வழியாக மூன்று பிரித்தானிய வட அமெரிக்க காலனிகளைக்கொண்டு கனடா உருவாக்கப்பட்டது. அச்சமயத்தில் இது நான்கு மாநிலங்களைக் கொண்டிருந்தது. பிரித்தானியாவின் குடியிருப்புகளாக இருந்த Ontario, கியூபெக், New Brunswick, Nova Scotia ஆகிய மாநிலங்கள், பிரித்தானிய வட அமெரிக்க சட்டத்தின் வழியாக, கனேடிய கூட்டரசாக உருவானது. கனடாவின் பிற மாநிலங்கள் பின்னர் அவ்வரசில் சேர்ந்தன. 1949ஆம் ஆண்டில், New Foundland மாநிலம், கனடாவுடன் கடைசியாக இணைந்தது.

வெளியுறவுக் கொள்கை

பிரெஞ்சு, ஆங்கிலேயக் குடியேற்றதாரர்கள், First Nations எனப்படும் முதல் குடிமக்கள் இனத்தவர் ஆகியோரால் உருவாக்கப்பட்ட கனடா கூட்டமைப்பில் ஏற்படுத்தப்பட்ட ஒப்பந்தங்களின்படி கனடாவை இணைக்கும் இரயில் பாதை ஒன்று கட்டவேண்டிய தேவை இருந்தது. இதற்காக 1870களில் சீனர்கள் இரயில் பாதை கட்டமைப்பில் வேலை செய்வதற்காக வரவழைக்கப்பட்டனர். 1885ஆம் ஆண்டு அப்பாதை கட்டிமுடிக்கப்பட்ட பின்பு, சீனர்கள் வரவு, குறிப்பாக 1923ஆம் ஆண்டு நடைமுறைப்படுத்தப்பட்ட "Chinese Exclusion Act" வழியாக கட்டுப்படுத்தப்பட்டது. 1920ஆம் ஆண்டளவில் கனடாவில் இன அடிப்படையிலான குடிவரவுக் கொள்கைகள் பின்பற்றப்படத் தொடங்கின. இதன் காரணமாக ஐரோப்பியர் தவிர, ஏனைய இன மக்கள் கனடாவுக்குள் வருவது கடினமாக்கப்பட்டது. ஆயினும் இக்கொள்கை 1967ஆம் ஆண்டு நீக்கப்பட்டது. 1971ஆம் ஆண்டில், பல இனப் பண்பாட்டு கொள்கையை அதிகாரப்பூர்வ கொள்கையாக ஏற்றுக்கொண்ட உலகின் முதல் நாடாக கனடா விளங்கியது. அதனைத் தொடர்ந்து பன்னாட்டு மக்களும் கனடாவுக்கு வருவது அதிகரித்தது. இக்கொள்கையால், 1980களிலும் 1990களிலும் தமிழர்கள், பிற தெற்காசிய மக்கள், ஆப்ரிக்கர்கள் கணிசமான தொகையினராக இருந்தனர்.

கனடாவில் கிறிஸ்தவம்

கனடாவில் திருத்தந்தை

கனடாவில் 2011ம் ஆண்டின் கணக்கெடுப்பின்படி, அந்நாட்டின் மொத்த மக்கள் தொகையில் 67.2 விழுக்காடு கிறிஸ்தவர்கள். இவர்களில் பெரும்பான்மையினர் கத்தோலிக்கர். அந்நாட்டில் 23.9 விழுக்காட்டினர், எவ்வித மதங்களையும் பின்பற்றாதவர்கள். 3.2 விழுக்காடு இசுலாமியரும், 1.5 விழுக்காடு இந்துக்களும், 1.4 விழுக்காடு சீக்கியர்களும், 1.1 விழுக்காடு புத்த மதத்தினரும், 1 விழுக்காடு யூதர்களும் அந்நாட்டில் உள்ளனர். கனடாவில் அரசு மதம் என்று எதுவும் கிடையாது. ஆயினும், கனடாவின்  அரசியல் கலாச்சாரத்தின்படி, பல்சமயத்தன்மை மற்றும், சமய சுதந்திரம் ஆகியவற்றுக்கு கனடா அரசு ஆதரவு வழங்குகிறது. ஐரோப்பிய காலனி ஆதிக்கத்திற்குமுன்பு, பூர்வீக இன மக்களின் இயற்கையை வழிபடும் மதங்கள் பரவலாக நிலவின. பூர்வீக இனத்தவர், ஆவிகளுக்கும் இயற்கைக்கும் மரியாதை அளித்தது உட்பட, அவர்களின் மதங்கள் கடைப்பிடிக்கப்பட்டு வந்தன.

16ம் நூற்றாண்டில் தொடங்கிய பிரெஞ்சு காலனி ஆதிக்கத்தின்போது, உரோம் இலத்தீன் வழிபாட்டுமுறை கத்தோலிக்கம் New Franceல், குறிப்பாக, தற்போதைய Nova Scotia வாகிய Lower Canada, மற்றும், கியூபெக்கில் பரவத் தொடங்கியது. 1534ஆம் ஆண்டு ஜூலை மாதம் 7ம் தேதி, பிரெஞ்சு அருள்பணியாளர் ஒருவர், நாடுகாண் பயணி Jacques Cartier அவர்களுக்கு, தற்போதைய நியூ பிரான்ஸ் அதாவது அப்போதைய Gaspè தீபகற்பத்தில் திருப்பலி நிறைவேற்றினார். 1608ஆம் ஆண்டில் கியூபெக்கிலும், 1642ஆம் ஆண்டில் Ville Marie அதாவது தற்போதைய Montreal நகரிலும் பிரெஞ்சு காலனி தொடங்கப்பட்டது. அதற்குப்பின்னர் பல பிரெஞ்சு துறவு சபைகள் கனடாவில் மறைப்பணியைத் தொடங்கின. இயேசு சபையினர், உரோனி பூர்வீக இனத்தவர் மத்தியில் மறைப்பணியைத் தொடங்கினர். அவர்களின் பணி 17ம் நூற்றாண்டில் வளமையடைந்தது. இவர்களின் மறைப்பணிக்குச் சான்றாக விளங்குபவர் புனித Kateri Tekakwitha (1656-1680) ஆவார். இவர் அமெரிக்காவின் முதல் பூரிவீக இனப் புனிதராவார். இவர், 2012ஆம் ஆண்டு அக்டோபர் 21ம் தேதி, முன்னாள் திருத்தந்தை 16ம் பெனடிக்ட் அவர்களால் புனிதராக அறிவிக்கப்பட்டார்.

18ஆம் நூற்றாண்டின் பாதியில் பிரித்தானியர் கனடாவை ஆக்ரமிக்கத் தொடங்கியது, கத்தோலிக்கத் திருஅவைக்கு இன்னலாக இருந்தது. எனினும், 19ஆம் நூற்றாண்டின் முதல் பாதியில், கத்தோலிக்கரின் மத சுதந்திரத்தை பிரித்தானிய காலனி அரசு மதித்தது. அதற்குப்பின்னர், 1841ஆம் ஆண்டில் கனடாவில் கத்தோலிக்கத் திருஅவை சட்டப்படி அங்கீகரிக்கப்பட்டதால், பல்வேறு துறவு சபைகள் அந்நாட்டில் பணிகளைத் தொடங்கின. தற்போது கனடாவில் அமைந்துள்ள 73 மறைமாவட்டங்களில் ஏறத்தாழ ஏழாயிரம் அருள்பணியாளர்கள் மறைப்பணியாற்றுகின்றனர். இக்காலக்கட்டத்தில் உலகில் நிலவும் உலகாயுதப் போக்கின் மத்தியில் மறைப்பணியாற்றும் பெரும் சவாலை கனடாவின் கத்தோலிக்கத் திருஅவை எதிர்கொண்டு வருகிறது. ஞாயிறு திருப்பலிகளில் 15 முதல் 25 விழுக்காட்டு கத்தோலிக்கரே பங்கு கொள்கின்றனர் என்று செய்திகள் கூறுகின்றன. இருந்தபோதிலும், கனடாவின் கத்தோலிக்கத் திருஅவை, பிற கிறிஸ்தவ சபைகள் மற்றும், மதங்களோடும், பூர்வீக இன மக்களோடும் உரையாடலை மேற்கொண்டு வருகிறது.

ஆர்த்தடாக்ஸ் கிறிஸ்தவ சபை

மேலும், ஆர்த்தடாக்ஸ் கிறிஸ்தவ சபையினர், 1890களின் தொடக்கத்திலிருந்து, ஆஸ்ட்ரிய-ஹங்கேரி  பேரரசின் கிழக்கு மற்றும், தென் பகுதியிலிருந்தும், மேற்கத்திய இரஷ்யப் பேரரசிலிருந்தும் கனடாவுக்குள் வரத் தொடங்கினர். இருபதாம் நூற்றாண்டில், முன்னாள் சோவியத் யூனியன், அதனைச் சேர்ந்த கிழக்கத்திய நாடுகள், கிரேக்கம் மற்றும் ஏனைய நாடுகளிலிருந்து புலம்பெயர்ந்த ஆர்த்தடாக்ஸ் கிறிஸ்தவர்கள் கனடாவில் குடியேறத் தொடங்கியபோது கனடாவில் அச்சபை பரவத் தொடங்கியது. தற்போது கனடாவில் கிறிஸ்தவம் சரிவைக் கண்டுவருகிறது எனக் கூறப்படுகிறது. மக்கள் தங்களின் தினசரி வாழ்வில் மதத்தை முக்கியமற்றதாக கருதுகின்றனர். மதத்தைக் கடைப்பிடிப்பது தனிமனிதரைச் சார்ந்தது என்ற மனநிலை பரவலாக நிலவுகிறது. இருந்தபோதிலும் அம்மக்கள் கடவுள் நம்பிக்கையைக் கைவிட்டுவிடவில்லை.

“ஒன்றிணைந்து பயணம்” என்ற தலைப்பில், கனடாவில் திருத்தந்தை பிரான்சிஸ் அவர்கள் மேற்கொண்டுவரும் 37வது வெளிநாட்டுத் திருத்தூதுப் பயணத்தின் நோக்கம் நிறைவேற இறைவனைப் பிரார்த்திப்போம். திருத்தந்தை பிரான்சிஸ் அவர்கள், ஜூலை 24, இஞ்ஞாயிறு முதல், 29ம் தேதி வரை, கனடாவில் திருத்தூதுப் பயணம் மேற்கொண்டு, 30ம் தேதி உள்ளூர் நேரம் காலை 7.50 மணிக்கு உரோம் பியூமிச்சினோ பன்னட்டு விமான நிலையம் வந்திறங்குவார் என எதிர்பார்க்கப்படுகிறது.