Cerca

Vatican News
Vitu vingine ambavyo ni hatari ni taka na plastiki zinazotupwa baharini na kwa maana hiyo kila mwaka tani zaidi ya milioni 8 za plastiki hatari hutupwa baharini Vitu vingine ambavyo ni hatari ni taka na plastiki zinazotupwa baharini na kwa maana hiyo kila mwaka tani zaidi ya milioni 8 za plastiki hatari hutupwa baharini  

Visiwa vya Pasifiki:Ongezeko la madhara ya mabadiliko ya tabia nchi na kujaa kwa bahari!

Katika kutembelea Fiji kwa mara ya kwanza kama Katibu Mkuu wa Umoja wa Mataifa,Bwana António Guterres ameelezea changamoto msingi mbili ambazo zinakabiliwa na viongozi wanaohudhuria Jukwaa la Visiwa vya Pasifiki siku ya Alhamisi tarehe 14 Mei 2019,yaani mabadiliko ya tabianchi na bahari za dunia kuongezeka,ambazo zinahatarisha kuimarika kwa mataifa ya chini.

Na Sr. Angela Rwezaula - Vatican

Katibu Mkuu wa Umoja wa Mataifa Antonio Guterres aliyeko ziarani huko nchi za visiwa vya Pasifiki, tarehe 14 Mei 2019 amehutubia mkutano wa Jukwaa la viongozi wa visiwa vya  ukanda huo akiangazia mambo makuu mawili ambayo ni changamoto, lakini siyo tu kwa eneo hilo bali ulimwengu mzima kwa ujumla. Akihutubia mkutano huo kwenye mji mkuu wa Fiji, Suva, Bwana Guterres ametaja changamoto hizo kuwa ni ongezeko la madhara yatokanayo na mabadiliko ya tabianchi na tishio linaloongezeka dhidi ya bahari duniani. Katibu Mkuu amesema vichocheo vya mabadiliko ya tabianchi viko dhahiri kwa kutaja mifano ya  ongezeko la utoaji wa hewa chafuzi ambayo amesema imefikia viwango vya juu zaidi kuwahi kufikiwa na hakuna dalili za kupungua.“Miaka minne iliyopita ilikuwa na joto kupindukia. Kutoweka kwa theluji huko Greenland ncha ya kaskazini mwa dunia kunazidi kushika kasi, ikiwa na maana ya kuwa viwango vya maji ya bahari vitaongezeka kwa mita moja ifikapo mwaka 2100 iwapo hakuna hatua zinachukuliwa kudhibiti”, amesema. Aidha ameongeza, kwa upande wa bahari ya Pasifiki, ongezeko la kiwango cha maji ya bahari katika maeneo mengine ni mara nne zaidi kuliko kiwango cha wastani duniani na hivyo kutishia uwepo baadhi ya nchi za visiwa.

Madhara yatokanayo na majanga ya asili ni vimbunga,tetemeko la ardhi, milipuko ya volkano

Bwana Guterres ametaja pia madhara mengine yatokanayo na majanga ya asili kama vile vimbunga, milipuko ya volkano na matetemeko mengi ya ardhi katika nchi mbalimbali na kuwa ni viashiria vya jinsi nchi hizo za visiwani huko ukanda wa Pasifiki ziko hatarini, na  kwamba,  mabadiliko ya tabianchi yatazidisha zaidi hizi hatari ambazo zinaathiri pia afya ya umma. Katibu Mkuu amesema mabadiliko ya tabianchi pia yanatishia usalama akinukuu azimio la Boe lililoridhiwa mwaka 2018. Katika mantiki hiyo Katibu Mkuu amesema tayari ameunda jopo la kubainisha uhusiano dhahiri kati ya mabadiliko ya tabianchi na ukosefu wa usalama kwamba: “nina hamu ya kuwasikiliza na kushauriniana nanyi zaidi kuhusu suala hili.” Hata hivyo amepongeza jinsi nchi za visiwa vya Pasifiki zimekuwa zikichukua hatua dhidi ya changamoto za sasa na zijazo zitokanazo na mabadiliko ya tabianchi, kwamba: “mnaandika historia ya hatua za kukabili mabadiliko na matumizi ya ufahamu wa kiasili. Mnawapatia changamoto wale waliozoea hali ilivyo.”

Bwana Guterres amesema Umoja wa Mataifa kwa upande wake umeazimia kusaidia jitihada za mataifa hayo dhidi ya mabadiliko ya tabianchi na kubadili mwelekeo ambao unatishia uwepo wa tamaduni zao na visiwa hivyo. “Ndio maana nimeomba Ufaransa, Jamaica na Qatar ziongoze uhamasishaji wa jamii ya kimataifa ili kupata dola bilioni 100 kwa mwaka kuanzia mwaka 2020 ili kusaidia mataifa yanayoendelea katika kuhimili na kukabili madhara ya mabadiliko ya tabianchi,” amesema Katibu Mkuu.

Kila mwaka tani zaidi ya miolini 8 za plastiki zinatupwa baharini

Katibu Mkuu Guterres kadhalika  amegusia jinsi ambavyo mabadiliko ya tabianchi yanavyoathiri ustawi wa bahari ambayo ni muhimu katika uchumi na utamaduni wa nchi zilizoko kwenye bahari ya Pasifiki. Kiwango cha joto baharini kinaongezeka, sambamba na kiwango cha cha juu na hivyo kusababisha matumbawe kupata rangi nyeupe na kuharibu bayonuai.” Vile vile kando kando ya ongezeko la joto, shughuli nyingine kama vile uvuvi kupita kiasi nao ni tishio la  rasilimali za baharini huku kiwango cha oksijeni baharini kikipungua na hivyo kusababisha hatari ya kutoweka kwa baadhi ya viumbe vya baharini. Vitu vingine ambavyo ni hatari ni taka na plastiki zinazotupwa baharini na kuthibitisha kuwa, kila mwaka tani zaidi ya milioni 8 za plastiki hatari hutupwa baharini. Tafiti za hivi karibuni zaidi zinaonesha kuwa iwapo hakuna hatua zinachukuliwa, kiwango cha taka za plastiki kitazidi kiwango cha samaki baharini ifikapo mwaka 2050.”

Mkutano wa kuchukua hatua kwa ajili ya mabadiliko ya tabianchi, utakaofanyika New  York, Marekani mwezi Septemba 2019

Pamoja na kupongeza hatua za mataifa mbalimbali ikiwemo ya ukanda wa Pasifiki kukabili hali hiyo, ameongeza kusema ni vyema kuwe na hatua za kasi zaidi kwa ajili ya kudhibiti mabadiliko ya tabianchi na uharibifu wa bahari. Na hii kutokana na kwamba inahitaji hatua zilizo sambamba na mkataba wa Paris wa mabadiliko ya tabianchi, ajenda 2030 pamoja na mkataba wa kimataifa kuhusu bahari. Ameongeza kusema kuwa mbinu na mifumo ipo cha msingi sasa ni udharura, utashi wa kisiasa na nia ya dhati na ni kwa msingi huo ataweza kuwa mwenyeji wa mkutano wa kuchukua hatua kwa ajili ya mabadiliko ya tabianchi, utakaofanyika New  York, Marekani mwezi Septemba 2019. Akifafanua kuhusu Mkutano huo  Katibu Mkuu amesema, utakuwa fursa kwa mataifa kuongeza ahadi zao ili ziweze kupunguza kiwango cha utoaji wa hewa chafuzi ifikapo mwaka 2020 na hatimaye kutotoa kabisa hewa hizo ifikapo katikati mwa karne ya sasa.

15 May 2019, 13:25