Kanisa Kuu la Mt. Petro kuandaa Mwaka wa Jubilei 2025

Na Angella Rwezaula – Vatican.

Mwaka wa Jubilei 2025 unakaribia na Kanisa kuu la Mtakatifu Petro, linajiandaa kwa adhimisho hili kuu la imani. Kardinali Mauro Gambetti, Askofu Mkuu wa Kanisa Kuu la Vatican, ameeleza kuhusu maandalizi hayo na upangaji upya unaoendelea katika mahojiano maalum na vyombo vya habari vya Vatican. Mwadhama, tarehe 11 Februari Papa Francisko alielezea mwaka wa Jubilei kama ‘zawadi ya neema’ ambayo inaweza kupatikana kwa njia ya ‘hija, msamaha, ushuhuda hai wa imani’. Katika barua yake kwa Askofu Mkuu Fisichella, Papa Francisko anawaalika jumuiya ya Wakristo kuuishi Mwaka Mtakatifu “katika umuhimu wake wote wa kichungaji.”

Je unahisi kuhusika katika njia gani?

Kanisa Kuu la Mtakatifu Petro pia linahisi wito wa kukaribisha mwaliko wa Papa wa kujiandaa na Mwaka Mtakatifu katika miaka hii mitatu inayoelekea kwa kuendelea katika mwendelezo na uvumbuzi wa utume wake. Hasa, Kanisa Kuu linajiandaa kwa Jubilei kuu ya 2025 chini ya ishara ya Mtume Petro ambaye, katika Barua ya kwanza kati ya mbili anazohusishwa naye, anawahutubia waamini wa Asia Ndogo, akiwaalika zaidi ya yote kugundua tena msingi wa kiroho wa tumaini: Atukuzwe Mungu na Baba wa Bwana wetu Yesu Kristo! Kwa rehema zake kuu ametuzaa upya katika tumaini lililo hai kwa kufufuka kwake Yesu Kristo katika wafu (1 Petro 1:3). Kanisa kuu la Mtakatifu Petro linapenda kuendelea kutoa chakula cha kiroho kwa ajili ya ‘mahujaji wa matumaini,’ kama Baba Mtakatifu Francisko anavyowaita, ni mahali pa kupata upatanisho unaobubujika kutokana na kukutana na Yesu na kuinua sala ya pamoja kwamba utawala wake wa haki na amani unaweza kuenea duniani kote. Wakati huo huo, Kanisa Kuu la Mtakatifu Petro pia linalenga kuwa mahali pa kukutana na kutafakari mada za udugu na mazingira yaliyochaguliwa na Baba Mtakatifu ili kusaidia ulimwengu ambao umeathirika kutokana na janga hili na vita vinavyoendelea kufika hadi kuzaliwa upya ambayo sisi sote tunahisi umuhimu wake'.

Je, unajiandaa vipi kwa Jubilei?

Uchungaji wa kawaida na wa maalum wa Kanisa Kuu unafanywa kwa upya ili 'kuweka taa ya matumaini ikiwaka.' Kwanza kabisa, tunatazama mtazamo wa kiroho ili kutoa uwezekano wa kuzama katika sala na kuabudu; na kutoka katika mtazamo wa kikanisa, kuhimiza kukutana  na roho ya Petro mahali pa kaburi lake; hatimaye, kwa mtazamo wa kiutamaduni, ili kuruhusu watu kutafakari kazi za sanaa takatifu katika Kanisa Kuu. Kwa kuzingatia Jubilei inayokuja, Kanisa Kuu linajiandaa kuwakaribisha mamilioni ya mahujaji wanaotarajiwa kutoka duniani kote. Matukio kadhaa yanapendekezwa kuanzia mwaka huu, yaliyofafanuliwa kwa kipindi cha miaka mitatu kwa kujikita na mada: ukaribu na utunzaji (2022), upatanisho na utakaso wa kumbukumbu (2023), “upendo wa kisiasa” (2024); na hatimaye katika mwaka wa 2025 njia hiyo itapelekea uzoefu wa Jubilei ya udugu wa (ulimwengu) wa 'mahujaji wa matumaini'.

Mada iliyochaguliwa kwa kipindi cha maandalizi ya miaka mitatu yataambatana na programu ya Kamati ya Jubilei. Wakati huo huo, shukrani pia kwa kasi mpya inayohusishwa na uhuishaji wa kiliturujia na huduma ya kichungaji na Parokia ya Kanisa Kuu la  Mtakatifu Petro, maadhimisho ya kiliturujia na uzoefu wa sakramenti unapangwa kwa upya. Baadhi ya mipango inahamasisha  ili kukuza uchaji wa kiungu maalumu na mwelekeo wa kutafakari wa sala. Kwa mfano, upangaji na utambuzi wa nyakati za tafakari na sala kwa namna ya maandamano  yaliyowekwa wakfu kwa Mtakatifu Petro na Mama Yetu, mazoezi ya uchaji wa kimungu wa Njia ya Msalaba, uhuishaji wa Kuabudu Ekaristi, simulizi la maisha ya Yesu na kuzaliwa kwa Kanisa, pamoja na ushuhuda wa Mtume Petro.

Wageni watakaribishwaje?

Kazi kubwa ya utulivu inaendelea kufafanua hata kwa uwazi zaidi jukumu la Madhabahu ya kanisa Kuu la  Mtakatifu Petro kuwa katika huduma ya wale wanaotembelea. Lengo ni kuruhusu kila mtu kupata uzoefu wa hija, picha ambayo inakurudisha katika maisha na tukio ambalo linaunganisha waamini na wasioamini sawa. Mpango mpya unaobuniwa kwa sasa kuhusu jinsi ya kusindikiza watalii katika ugunduzi wao wa hazina zinazopatikana ndani ya Mtakatifu Petro na umuhimu wake, wakati upangaji upya wa mapokezi ya wageni unaendelea. Hatua ya kwanza itakuwa kutofautisha, kwa njia ya mlango unaoongozwa, ratiba za waamini wanaotaka kupokea sakramenti au kupata tendo la imani na ibada ndani ya mahali patakatifu, tofauti na uwepo wa watalii ambao watapewa utangulizi na msindikizaji wakati wa ziara yao ya kuwahimiza kujionea uzuri na msukumo wa kazi za sanaa. Wakati huo huo, Mfuko wa Mtakatifu Petro, ofisi ya Kanisa Kuu kwa nia ya utume wake inashughulikia njia za kuunga mkono mchakato huu na kuwapa wamini na wageni mahali pa kukaribisha zaidi, salama, kufikika na mazingira rafiki. 

Je, hali ya kifedha ya Mfuko wa Mtakarifu Pietro ikoje?

Utawala wa sasa wa Mfuko wa Mtakatifu Petro ulirithi ukweli thabiti na uliodumishwa vyema, shukrani kwa kazi ya usimamizi wa hapo awali, hasa wale kwa mfano wa urais wa Kardinali Angelo Comastri. Licha ya changamoto zinazosababishwa na janga hili, na kuongeza mkazo mkubwa kwa muundo na watu, utawala mpya umerithi taasisi yenye msingi thabiti ambayo itairuhusu kutekeleza mipango ya siku zijazo na kukabiliana na changamoto mpya. Hii imeruhusu Mfuko huko  kuzingatia kuboresha shughuli zake katika maeneo fulani ambayo ni muhimu leo hii.

Je unaweza kutoa mifano fulani?

Nitajibu kwa maneno machache muhimu. Ukarimu. Tovuti mpya inaundwa ambayo itatumika kama tovuti pepe ya kuweza kuingia kwenye Kanisa Kuu, kwa kupata kujua zaidi kuihusu, na kwa ajili ya kupanga ziara na kushiriki katika shughuli zake; statio peregrinorum, yaani njia ya hija imeundwa kwa upya, ofisi iliyotengwa kwa ajili ya kuwakaribisha mahujaji wanaofika kwenye Kaburi la Mtume baada ya kusafiri umbali mrefu kwa miguu au kwa baiskeli; aina mpya ya kuendeleza mahujaji inapangwa ili kuwapendelea watu ambao hawana uwezo wa kifedha wa kufanya safari hiyo.

Usalama. Mipango imeanza kwa uchunguzi  tata, kwa ufuatiliaji wa nguvu ya muundo na ufuatiliaji wa vifaa vya mawe kwa kifuniko, kwa kuzingatia uboreshaji wa huo, kazi ya matengenezo ya utaratibu; mpango wa njia zitakazosimamia vyema vikundi vya wageni watakaofikia katika Kanisa Kuu unapangwa pamoja na uboreshaji wa mfumo wa ufuatiliaji wa mfumo wa video.

Ufikiaji. Ratiba mpya za mada za sanaa na imani zinatayarishwa, ambayo pia itaruhusu kutembelea maeneo yaliyopo juu ya Kanisa Kuu la Mtakatifu Petro ambayo hapo awali hayakuweza kufikiwa; ukarabati wa mtaro wa Juu unaendelea, pamoja na kutafakari upya eneo la kiburudisho ili kuhamasisha wageni kupata historia, uzuri na kiroho; kazi inapangwa kuboresha miunganisho ya mitambo kwa kupanda na kushuka kwenye chini ya Jengo. Uendelevu. Mchakato unaanzishwa ambao utaongoza kuingia ndani ya Kanisa Kuu la Mtakatifu Petro kwa kiwango cha juu cha uendelevu wa mazingira na nishati ili kufikia Jubilei ya 2025 na kutotoa kabisa hewa ya mahali  patakatifu na tata la majengo yanayohusiana nayo; kwa kuongezea, zana za habari na msaada zitatengenezwa kwa wageni na mahujaji na usambazaji wa Mazoea Bora; hatimaye, njia endelevu za kupanga na usimamizi wa vifaa zitahamasishwa, kwa mazungumzo na Tawala zinazofaa.

Je, umati wa mahujaji utasimamiwa vipi?

Ili kufikia malengo na kuendelea kuvumbua na kukabiliana na mabadiliko yanayohitajika na historia, tunahitaji kutumia vipengele vya mapinduzi ya kidijitali, kutumia uwezo ambao teknolojia inatoa na kuuelekeza kwenye huduma ya usimamizi na mapokezi. Kwa sababu hiyo, ofisi maalum ya teknolojia ya habari imeundwa. Vile vile, ni vyema kupanga kwa ajili ya malezi endelevu ya wachungaji, wahudumu, viongozi wanaosindikiza  vikundi, wafanyakaz, wa Kanisa kuu hasa, ili kustawisha maendeleo shirikishi ya watu na kuboresha huduma, huduma na utekelezaji wa kazi na utume wake. Hii ndiyo sababu malezi ya ndani pia yanajumuisha maandalizi ya vihuishaji vya kiliturujia, baadhi ya kozi za utaalam kwa miongozo, na shule ya Sanaa na Ufundi.

Mwishoni mwa 2021, Papa alianzisha “Fratelli tutti”. Tuambie zaidi kuhusu hili...

Kuanzishwa kwa Mfuko wa  Fratelli tutti pia utasaidia Mfuko wa Mtakatifu Petro katika maandalizi yake ya Jubilei katika maeneo ya malezi na mazungumzo na utamaduni, watu na dini. Mipango  hii na mingineyo inahitaji marekebisho katika masuala ya utawala, mkakati, na shirika ambalo linahusisha uwekezaji kwa watu kupitia uimarishaji wa taaluma ya ndani, kwa kiasi fulani kusambazwa upya na kuhamishwa upya ushiriki wa wataalamu walio na uzoefu uliothibitishwa na ujuzi katika usimamizi wa maeneo muhimu; na baadhi ya uwekezaji katika miundombinu na vifaa. Haya yote yanaonekana kufikiwa, pia kutokana na ushirikiano mwema na ofisi nyingine za Vatican, Mabaraza ya Kipapa na Taasisi zilizounganishwa na Vatican na  shukrani kwa mchango wa thamani na wa kujitoa bure wa wafanyabiashara na wataalam katika makampuni ya faida na yasiyo ya faida, na mchango wa Serikali ya Italia kwa Jubilei ya 2025. Wote wanatambua katika Kanisa Kuu la Mtakatifu Petro alama ya Ukristo na kwa Baba Mtakatifu 'nyota' yenye uwezo wa kusonga na kuelekeza matamanio ya ndani kabisa ya mwanadamu kuelekea lengo linalotarajiwa ambalo linawekwa katika katikati ya mwaka wa Jubilei.