Papa:Wazazi wasikubali elimu ya Watoto wao kinyume na maadili

Na Angella Rwezaula, - Vatican.

Baba Mtakatifu Francisko, Jumamosi tarehe 11 Novemba 2023 amekutana na  Washiriki wa Mkutano Mkuu na Baraza la Chama cha Wazazi barani  Ulaya. Akianza hotuba yake ameelezea furaha ya kukutana nao katika fursa ya mkutano wao ambapo amewatakia matunda bora na kwa namna hiyo wamempatia fursa ya kushirikishana nao baadhi ya tafakari  kuhusu wito na utume wa wazazi. Kuwa mzazi ni mojawapo ya furaha kuu ya maisha, kuleta nguvu mpya, kasi na shauku kwa wanandoa, ambao hata hivyo mara nyingi hujikuta wanakabiliwa na majukumu ya elimu ambayo hawana maandalizi kidogo. Tunaweza kufikiria, kwa mfano, juu ya uhitaji wa kuwapatia watoto utunzaji wa upendo huku tukiwasaidia kukua hadi kufikia ukomavu na kujitegemea; au kuwasaidia kupata tabia nzuri na mitindo ya maisha yenye afya huku tukizingatia tabia na vipawa vyao binafsi, na sio kulazimisha matarajio yetu wenyewe. Vile vile, kuwasaidia kuzoea shule na kukuza mtazamo chanya wa upendo na kuepuka kujamiiana, na wakati huo huo kuwalinda dhidi ya vitisho kama vile uonevu, pombe, matumizi ya sigala, picha mbaya, michezo ya video yenye nguvu, kamari, dawa za kulevya na kadhalika.

Baba Mtakatifu Francisko amebainisha kwamba na hii ndiyo sababu mitandao ya usaidizi kwa wazazi, kama vile Jumuiya yao wenyewe, ni muhimu sana. Kwa kuwawezesha wazazi kubadilishana uzoefu na njia za kielimu, mitandao hiyo huwasaidia kujiandaa vyema na zaidi ya yote, wasihisi kuachwa au kuvunjika moyo. Dhamira ya kielimu ya wazazi kwa hakika haihimizwi na muktadha wa kiutamaduni wa leo hii na hasa  kwa Ulaya inayowekwa alama na ubinafsi wa kimaadili na uyakinifu wa vitendo. Utu wa mtu, ingawa umethibitishwa kila mara, wakati mwingine hauheshimiwi. Wazazi hutambua hivi karibuni kwamba watoto wao wamezama katika mazingira haya ya kiutamaduni. Wanachochukua kutoka katika vyombo vya habari mara nyingi hukinzana na kile, hadi miongo michache iliyopita, kilichukuliwa kuwa "kawaida" lakini sivyo tena. Hivyo wazazi hujikuta wakilazimika daima kuwaonesha watoto wao wema na usawaziko wa maamuzi na maadili ambayo hayawezi kuchukuliwa kuwa ya maana tena, kama vile umuhimu wa ndoa na familia, au uamuzi wa kukubali watoto kuwa zawadi kutoka kwa Mungu.

Baba Mtakatifu anabainisha kuwa hili si jambo rahisi, kwani haya ni maadili ambayo yanaweza kupitishwa tu na ushuhuda wa maisha! Wakikabiliwa na magumu hayo, ambayo kwa hakika yaweza kuwa ya kukatisha tamaa, kuna uhitaji wa kusaidiana na kutiana moyo, ili wazazi waweze kusaidiwa kusitawisha “shauku” ya utume wao wa elimu. Kulea watoto ni kuwafundisha maana ya kuwa binadamu kamili. Utamaduni unaotuzunguka unaweza kubadilika, lakini mahitaji ya moyo wa mwanadamu yanabaki sawa, na hatimaye hii inaonekana kuwa kweli, hata katika maisha ya watoto. Hiyo lazima iwe mahali petu pa kuanzia kila wakati. Mungu mwenyewe amepanda katika asili yetu hitaji lisilozuilika la upendo, ukweli na uzuri, uwazi kwa wengine katika mahusiano yenye afya na uwazi kwake kama Muumba wetu. Matamanio haya ya moyo wa mwanadamu ni washirika wenye nguvu wa kila mwalimu. Watoto wakisaidiwa kuwatambua na kuwajali, hawatakuwa na ugumu wa kuona wema na thamani ya kielelezo ambacho wazazi wao waliweka. Kazi ya elimu inaweza kusemwa kuwa yenye mafanikio wakati watoto wanakuja kutambua uzuri wa maisha katika ulimwengu huu na kukuza ujasiri na shauku juu ya matarajio ya kuanza safari ya maisha, wakiwa na hakika kwamba wao pia wana dhamira ya kutekeleza, ya utume ambayo itawaletea utimilifu mkubwa na furaha.

Haya yote,  Baba Mtakatifu amewambia kuwa , yanawakilisha utambuzi wa kina wa upendo mkuu wa Mungu kwetu. Tunapotambua kwamba kiini cha utu wetu ni upendo wa Mungu Baba yetu, basi tunaona waziwazi kwamba maisha ni mazuri, na kwamba kuzaliwa ni kuzuri na kwamba kupenda ni kuzuri. Kila mtu anaweza kusema, "Mungu mwenyewe amenifanya zawadi nzuri, na mimi mwenyewe ni zawadi kwa wapendwa wangu na kwa ulimwengu". Uhakika huu hutusaidia tusiishi maisha yanayoongozwa na mwelekeo wa kudhalilisha wa "kujilimbikizia" mali, wasiwasi wa mara kwa mara wa kutojihatarisha, kutojihusisha kupita kiasi, kutochafua mikono yetu, kwa kuwa kuna "mitego" kama hiyo, Papa Francisko ameonya. Uhai huchanua katika utajiri na uzuri wake wote unapotolewa kwa ukarimu, wakati, kama Yesu alivyofundisha, ‘tunajipoteza wenyewe’ kwa ajili ya wengine na hivyo kujipata wenyewe kiukweli. Maisha hufungua kwa utajiri wake kamili tunapotoa, tunapojitolea wenyewe.

Baba Mtakatifu anasisitiza kuwa huu ndio utume wa hali ya juu wa elimu wa wazazi: kuunda watu huru na wakarimu ambao wamepata kujua upendo wa Mungu, na kuwapa wengine bure kile ambacho wao wenyewe wamepokea kama zawadi. Si rahisi kufikisha, lakini tuite hii "mapokezi ya kutoa bure". Hapa pia tunapata mizizi ya jamii yenye afya. Kwa sababu hii, ni muhimu kwamba jukumu la msingi la wazazi katika utaratibu wa kijamii kutambuliwa katika kila ngazi. Kulea watoto kunawakilisha mchango wa kweli kwa jamii, kwa sababu inamaanisha kuwafundisha vijana katika uhusiano mzuri na wa heshima na wengine, utayari wa kushirikiana kwa kuzingatia lengo la pamoja, kuwafanya wachukue jukumu, hisia ya wajibu na thamani ya sadaka kwa ajili ya manufaa ya wote.

Kazi nzuri kama nini hii! Haya yote ni tunu zinazowafanya vijana kuwa raia wa kutegemewa, imara, wenye uwezo wa kuchangia mahali pa kazi, masuala ya kiraia na mshikamano wa kijamii. Kwa kukosa hili, watoto hukua kama “visiwa,” wakiwa wametenganishwa na wengine, wasio na maono ya kawaida, na wamezoea kuzingatia matamanio yao wenyewe kuwa maadili kamili. Kwa njia hiyo, watoto huwa wapotovu, lakini hii hutokea tu wakati wazazi wenyewe wamepotoka! Matokeo yake, jamii "hutenganisha", inakua maskini na inazidi kudhoofika na kudhoofishwa. Basi, ipo haja ya wazi ya kulinda haki ya wazazi ya kuwalea na kuwasomesha watoto wao kwa uhuru, bila kujikuta wakibanwa katika nyanja yoyote hasa ile ya shule kukubali programu za elimu kinyume na imani na maadili yao. Hakika, hii ni changamoto kubwa sana kwa sasa.

Kanisa ni mama anayefuatana na wazazi na familia na kuwasaidia katika kazi zao za elimu. Sisi ni Kanisa. Baba Mtakatifu Francisko akiendela amebainsha kwamba katika miaka hii, tunajitahidi kuendeleza "Mkataba wa Kimataifa wa Elimu," ili kujumuisha dhamira ya pamoja kwa upande wa taasisi zote zinazoshughulikia vijana. Wakati huo huo, sisi pia tunakuza "Compact on the Family" yaani  Mkataba wa Familia na watendaji wa kiutamaduni, kitaaluma, kitaasisi na kichungaji, ili kuzingatia familia na uhusiano wake mbalimbali: kati ya mwanamume na mwanamke, wazazi na watoto, kaka na dada. Lengo lake  ni kuondokana na idadi ya "migogoro" ambayo kwa sasa inadhoofisha ulimwengu wa elimu: kuvunjika kati ya elimu na uvukaji wa elimu, kuvunjika kwa mahusiano kati ya watu binafsi, ambako kunatenganisha jamii kutoka katika familia, na kusababisha ukosefu wa usawa na aina mpya za umaskini. Kwa hiyo Baba Mtakatifu anawatia moyo wasonge  mbele kwa matumaini katika kujitolea kwo, na pia kwa ujasiri - ambao amesisitiza tunauhitaji sana leo  hii wakipata msukumo wa mara kwa mara na usaidizi kutoka kwa ushuhuda wa Injili kwa wazazi watakatifu Maria na Yosefu. Amewabariki na kuwaomba wamuombee pia.