Vatikani do të pajiset me një sistem agrovoltaik për autonominë energjetike
R.SH. – Vatikan
Një strukturë, që përdor energjinë diellore për të siguruar "jo vetëm furnizimin me energji elektrike të radiostacionit të atjeshëm, por edhe pavarësinë e plotë energjetike të Shtet-Qytetit të Vatikanit". Enciklika “Laudato si'” me të cilën Papa pohoi rëndësinë e kujdesit për shtëpinë tonë të përbashkët nëntë vjet më parë - ndër të tjera, duke na ftuar të reduktojmë emetimet ndotëse për klimën dhe ambientin - tani merr formë në një projekt, dashur nga Françesku, i cili e paraqet me një letër apostolike në formë motu proprio me titull “Vëlla Dielli”.
Mandati për krerët e Guvernatoratit dhe të APSA-s
Objektivi është të bëhet Vatikani i pavarur nga pikëpamja e furnizimit me energji përmes ndërtimit - brenda zonës ekstraterritoriale të Santa Maria di Galeria, ku ndodhet qendra e antenave të radios - të një "centrali agrovoltaik", një sistem që e shfrytëzon tokën bujqësore, si për të vendosur panelet fotovoltaike për prodhimin e energjisë elektrike të rinovueshme, ashtu edhe për ta kultivuar me perime e bimë të ndryshme. Në motu proprio Papa ua beson mandatin për ekzekutimin e projektit kryetarëve të Guvernatoratit dhe të APSA-s, duke u dhënë "pushtetin e plotë për të kryer aktet e nevojshme të administrimit të zakonshëm dhe të jashtëzakonshëm".
Kontributi i Vatikanit për klimën
Duke theksuar rëndësinë e reduktimit të "emetimeve të gazit serrë në atmosferë, me synim neutralitetin klimatik", Françesku kujton në motu proprio se më 6 korrik 2022 vëzhguesi i përhershëm i Selisë së Shenjtë në Pallatin e Qelqit në Nju Jork depozitoi në Sekretariatin e Përgjithshëm të OKB-së “dokumentet, me të cilat Selia e Shenjtë, në emër dhe për llogari të Shtet-Qytetit të Vatikanit, hyn në Konventën Kuadër të Kombeve të Bashkuara për Ndryshimet Klimatike”. Me këtë instrument, shkruan Papa, "desha të kontribuoj në përpjekjet e të gjitha shteteve për të ofruar, në përputhje me përgjegjësitë dhe aftësitë e tyre përkatëse, përgjigjen e duhur para sfidave të ndryshimeve klimatike për njerëzimin dhe shtëpinë tonë të përbashkët".
Sistemimi i territorit
Teksti sqaron se për të ruajtur privilegjin e ekstraterritorialitetit, garantuar nga Paktet e Lateranit, i duhet komunikuar autoriteteve italiane sistemimi i territorit në zonën e strukturave dhe selive të subjekteve, që i përkasin Selisë së Shenjtë dhe Guvernatoratit të Vatikanit. I kërkohet Sekretarisë së Shtetit të Vatikanit të ndihmojë që të mos hmbasë asgje nga ç’ka qenë deri tani në dispozicion të Selisë Apostolike.
