Medalje përkujtimore e shtegtimit të Papës në Mongoli
R.SH. / Vatikan
Gjatë shtegtimit të 43-të ndërombëtar apostolik të Papës Françesku në Mongoli, ndërmjet dhuratave që do t'u ofrohen autoriteteve, do të jenë edhe medaljet tradicionale përkujtimore, të prera për këtë rast.
Shkëmbimi i dhuratave ndërmjet të ftuarve dhe atyre që i përbujnë është zakon shumë i lashtë. Akti i dhurimit, çast i rëndësishëm dhe pasqyrë e miqësisë ndërmjet popujve, është zakon që vjen ndër ne që nga shoqëritë primitive. E vijon edhe në këtë shtegtim të jashtëzakonshëm të Papës së Romës që së shpejti do të takohet me autoritetet e vendit, të cilin gatitet ta vizitojë: dhurata ka gjithmonë kuptime simbolike, që lidhen ngushtë me miqësinë dhe me paqen.
Medalja për udhëtimin në Mongoli
Medaljet për shtegtimin janë si prej argjendi, 80 copë, ashtu edhe prej bronzi, të patinuara me dorë, të prera në 1500 ekzemplarë. Të gjitha medaljet janë shtypur nga Avs - Alberti Visconti Senesi Manifattura Metalli.
Artistja, që i krijoi, quhet Amalia Mistichelli, po ajo që krijoi edhe medaljen për Ditën Botërore të Rinisë në Lisbonë. Me stilin e saj të pagabueshëm arriti të bashkojë, në një hapësirë të kufizuar – me diametër 5 centimetra - monumentet dhe elementet më karakteristike të Mongolisë, duke krijuar një pamje të vetme të harmonishme.
Linjat e vizatimit, të holla dhe të pastra, shtrihen përgjatë sipërfaqes së gjallëruar me dritëhije, duke nxjerrë në pah thellësinë e atij, që duket si peizazh vërtet fantastik.
Mbi drejtësinë
Recto, pra faqja kryesore e medaljes, mban, si gjithmonë, stemën papnore me moton e Papës Françesku në rrotullën nën mburojë. Rreth e rrotull, mbishkrimi në latinisht: Franciscus Pontifex Maximus.
