Dikasteri i Vatikanit për Kulturën e Arsimin i pranishëm në Ditën Botërore të Rinisë 2023
R.SH. / Vatican News
Dikasteri i Selisë së Shenjtë për Kulturën dhe Arsimin vendosi të shfrytëzojë rastin e Ditës Botërore të Rinisë 2023 në Lisbonë për të vënë në jetë intuitën e madhe që pati Papa Françesku në vitin 2019 për të ndërtuar një Kompakt Global mbi Arsimin, për të mirën e brezave të rinj e, përmes tyre, të gjithë botës.
Fushata e mediave sociale
Për këtë qëllim, u planifikuan aktivitete të ndryshme si pjesë e DBR-së Para së gjithash, Dikasteri - aktualisht i udhëhequr nga Kardinali José Tolentino de Mendonça - do të jetë i pranishëm në Qytetin e Gëzimit me një pavijon që synon të bëjë të njohur Kompaktin Global e, mbi të gjitha, të mbledhë nga vizitorët e rinj (nëpërmjet aktiviteteve në pavijon dhe gjithashtu të një sondazhi online) përshtypjet, idetë dhe sugjerimet për arsimin dhe perspektivat e ardhshme. Vizitorët e rinj do të ftohen të ndajnë përvojën e vizitës së tyre duke përdorur hashtagun #globalcompactoneducation në tregimet, postimet dhe bobinat e tyre, e duke etiketuar @globalcompactoneducation në Instagram ose @GConEducation në Twitter. Atyre do t'u kërkohet gjithashtu të bëjnë një reel/video (maksimumi 90 sekonda) mbi përvojat veçanërisht të rëndësishme arsimore në të cilat marrin pjesë dhe ta dërgojnë atë në info@educationglobalcompact.org. Përvojat më interesante do të promovohen më pas në faqen e internetit:
Takime, biseda, dëshmi
Sot, 1 gusht, nga ora 14.30 deri në orën 04.00, në auditorin e Universitetit Katolik Portugez, në kuadër të nismave "Shtëpia për ekonominë e Françeskut" do të mbahet një takim për Paktin Global; ndërsa më 2 gusht, nga ora 3 deri në orën 5, në Fakultetin e Farmacisë të Universitetit të Lisbonës, në kuadër të nismave të Festivalit Rinor, do të zhvillohet një takim me temë “Shpresa. Thirrje për të edukuar” e promovuar nga Dikasteri, së bashku me një grup profesorësh nga shkollat katolike portugeze. Gjatë takimit, përmes disa dëshmive, do të flitet për rolin themelor të mësuesve dhe rëndësinë që të rinjtë ta kenë parasysh këtë lloj karriere. Më në fund, më 3 gusht, në orën 9, gjatë takimit të Papës me studentët e Universitetit Katolik Portugez do të ketë dëshmi nga një student i ri mbi përvojën e Paktit Global. Një tjetër dëshmi për Paktin Global të Arsimit është planifikuar për 4 gusht, në orën 2.30, në Qytetin e Gëzimit.
