Patriku ortodoks sirian viziton Jeruzalemin, pas 60 vitesh

R.SH. / Vatikan

Më 4 maj, patriku ortodoks sirian Ingazio Efrem II Karim shkoi për vizitë në Tokën  Shenjte. Hera e parë gjatë 60 vjetëve. E edhe vizita e parë në Jeruzalem e një patriku të Kishës Ortodokse pas Luftës Gjashtëditore të vitit 1967.

I shoqëruar nga një delegacion peshkopësh dhe priftërinjsh, Patriku mori pjesë në një procesion në manastirin e Shën Markut, në Jeruzalem, ku u prit nga murgjërit, priftërinjtë dhe diakonët e ku drejtoi lutjet dhe bekoi besimtarët e mbledhur.

Më pas vizitoi Portën e Jaff-ës në Qytetin e Vjetër dhe u prit nga përfaqësues të Kishave të Krishtera të Tokës së Shenjtë, duke përfshirë Vikarin Patriarkal për Jeruzalemin, Jordaninë dhe Tokën Shenjte, Kryepeshkopin Mor Anthimos Jack Yakoub, i cili mbajti një fjalim mirëseardhjeje drejtuar gjithë delegacionit. Prelati nënvizoi rëndësinë e vizitës së patrikut në Jeruzalem, duke e cilësuar ngjarje historike.

Patriku Ignatius Efrem II shkoi, më pas, për të vizituar Bazilikën e Varrit të Shenjtë, ku u lut mbi Varrin e Krishtit e edhe Kishën e Shenjtorëve Nikodemi e Jozefi, ku drejtoi lutje dhe bekoi besimtarët.