Në “Bambino Gesù”, terapia e parë në botë, e frytshme mbi 60% kundër neuroblastomës

R.SH. – Vatikan

 Me një efikasitet mbi 60%, është realizuar nga spitali “Bambino Gesù”, në Romë, terapia e parë gjenetike me qeliza Car-T, në gjendje të trajtojë, me një sukses më se të pranueshëm, format më të rënda të neuroblastomës, tumorit më të shpeshtë në moshën e fëmijërisë. E probabiliteti për të mbijetuar pa sëmundje është rritur mjaft në krahasim me zgjatjen e jetës pa trajtim mjekësor. Të dhënat për këtë terapi u paraqitën sot, në një konferencë për shtyp në spitalin e Selisë së Shenjtë, që njihet nga të gjithë edhe si “spitali i Papës”.

Trajtimi i ri mjekësor

Trajtimi i ri mjekësor është eksperimentuar në mbi 27 pacientë me neuroblastomë të përsëritur, ose rezistente ndaj terapive të zakonshme. Rezultatet e studimit janë publikuar në revistën prestigjoze shkencore “New England Journal of Medicine”. 63% e pacientëve kanë reaguar pozitivisht ndaj kurës e gjysma e tyre është në shërim e sipër. Terapia rrit edhe probabilitetin e mbijetesës pas 3 viteve. Në 60% të rasteve, tumori nuk kthehet. Gjithashtu, 36% e pacientëve shërohen krejtësisht. Siç shpjegohet në artikullin e publikuar, merita është e qelizave Car-T, që s’janë tjetër veçse lloj linfocitesh të modifikuara gjenetikisht. Ato mbeten në organizëm për 2-3 vite pas injektimit, duke siguruar frytshmërinë e terapisë. Qelizat e prodhuara kësaj here nga spitali Bambino Gesù konsiderohen të “brezit të tretë”, pra të një niveli tejet të lartë inxhinjerik. Deri tani, qelizat e përdorura gjerësisht në mjekësi janë të “brezit të dytë”.

Neuroblastoma

Neuroblastoma është tumori solid ekstrakranial më i shpeshtë në fëmijëri dhe përfaqëson rreth 7-10% të tumoreve tek fëmijët e moshës 0-5 vjeç. Ky tumor e ka origjinën nga neuroblastet, qeliza të pranishme në sistemin nervor, por mund të shfaqet në pjesë të ndryshme të trupit, sidomos në gjëndrën mbiveshkore. Edhe sot neuroblastoma është përgjegjëse për 11% të vdekjeve nga kanceri. Në format metastatike, ose në ato me rrezik të lartë përsëritjeje, probabiliteti i shërimit të plotë është 45-50%; në rast rikthimi ose kur turmori u reziston trajtimeve konvencionale (kimio dhe radioterapi), mundësia për të mbijetuar për 2 vjet, nuk e kalon 5-10%.