Krezhmët ftesë për ta luftuar të keqën me Krishtin

R.SH. - Vatikan

Të hysh në kohën shpirtërore e liturgjike të Kreshmëve do të thotë të përsëritësh premtimin personal e komunitar për t’i bërë ballë së keqes së bashku me Krishtin. Këtë na kujtoi Kisha, me ritin e përhimjes, në ditën e së Mërkurës së Përhime,  sivjet, më 2 mars, kur filluam kohën e përgatitjes shpirtërore të besimtarëve, për kremtimin e Pashkëve.

Duke u nisur nga realiteti i jetës së përditshme, i jetës konkrete me batica e zbatica, Kisha katolike na kujton edhe se Udha e Kryqit është e vetmja që çon në fitoren e dashurisë mbi urrejtjen, të njeridashjes mbi egoizmin, të paqes mbi dhunën.

Kreshmët janë luftim kundër së keqes

Kështu të Mërkurën e Përhime, me lutje, agjërim dhe ritin e përhimjes, hymë në Kohën e Kreshmëve, e bëjmë një pyetje: Çka do të thotë të hysh në Kreshmë? E si duhet jetuar kjo kohë që i paraprin festës së Pashkëve?. Kisha përgjigjet duke treguar të vetmen rrugë, që duhet përshkuar në luftën kundër së keqes. Do të thotë të fillosh një kohë impenjimi të posaçëm në luftën shpirtërore për t’iu kundërvënë së keqes, që është e pranishme në botë, në secilin nga ne e rreth nesh. Kjo do të thotë ta shikosh të keqen në sy e të jesh gati të luftosh kundër pasojave e, posaçërisht, kundër shkaqeve të saj, deri në shkakun e fundit, që është shejtani apo djalli i mallkuar.

Kuptimi i Kreshmëve, ka të bëjë edhe me përgjegjësinë e secilit nga ne në betejën kundër së keqes. Do të thotë, pra, të mos e shkarkosh problemin e së keqes mbi të tjerët, mbi shoqërinë, mbi bashkësinë e mbi Hyjin, por t’i njohësh mirë përgjegjësitë personale e ta marrësh mbi vete me vetëdije pjesën që të takon. Lidhur me këtë, për ne të krishterët tingëllon më urgjente se kurrë thirrja e Krishtit për ta marrë secili ‘kryqin’ e vet, çdo ditë, e për ta ndjekur me përvujtëri e besim Mësuesin Hyjnor.

Udha e Kryqit çon në fitoren e dashurisë mbi urrejtjen

E mos të harrojmë se Kryqi nuk është sinonim me gjëmën, me fatkeqësinë, që duhet të bësh çmos ta shmangësh, por mundësi që të ecësh në gjurmët e Krishtit e kështu të fitosh forcë në luftën kundër mëkatit e kundër së keqes. Rruga e kryqit është e vetmja që çon në fitoren e dashurisë mbi urrejtjen, të njeridashjes mbi vetëdashjen, të paqes mbi dhunën. Po t’i shikojmë në këtë këndvështrim e dritë, Kreshmët janë vërtetë rast i mirë impenjimi asketik e shpirtëror, mbështetur mbi forcën e hirit të Zotit.

Ftesa për t’u kthyer në rrugën e Zotit e për t’i besuar Ungjillit

Mesazhi që Kisha vijon t’ua drejton besimtarëve në fillim të Kreshmëve, na kujton fjalët e Jezusit pikërisht në fillim të misionit të tij publik, të cilat i dëgjojmë të përsëritura shpesh këto ditë Krezhmësh. Është ftesa për t’u kthyer në rrugën e Zotit e për t’i besuar Ungjillit, për t’u lutur e për të bërë pendesë. Ta mirëpresim ftesën e Kishës, që i bën jehonë asaj të Krishtit, e t’i lutemi të vazhdojmë me fe udhën e Kreshmëve, për ta jetuar këtë kohë me gëzim shpirtëror e impenjim bujar.