Dita për jetën e kushtuar: të thirrur për t’u bërë Kishë sinodale

R.SH. - Vatikan

Dita për jetën e kushtuar, që do të arrijë kulmin nesër, me kremtimin eukaristik kryesuar nga Papa Françesku në Bazilikën  e Shën Pjetrit, do të jetë “mundësi takimi me Zotin, që pasqyrohet në ngulmimin e hareshëm të shumë burrave e grave, të cilët ia kushtojnë gjithë jetën Zotit”. Kështu shkruajnë në një letër kardinali  João Braz de Aviz, prefekt i Kongregatës  për Institutet e jetës së kushtuar dhe Shoqëritë e jetës apostolike dhe sekretari i dikastetit, imzot José Rodríguez Carballo.

Pjesëmarrje në “ecjen” e Kishës udhës së sinodalitetit

Në dokument nënvizohet se udha sinodale, e saponisur, e bazuar mbi temën “Për një Kishë sinodale: bashkim, pjesëmarrje e mision”, i bën thirrje çdo bashkësie vokacionale “të jetë shprehje e dukshme e bashkimit të dashurisë”. Duke reflektuar mbi fjalën “pjesëmarrje”, kardinali João Braz de Aviz dhe imzot José Rodríguez Carballo ftojnë për t’i bërë vetes pyetjen: “Kush janë këto motra e këta vëllezër, që i dëgjojmë e, para së gjithash, pse i dëgjojmë?”. “Pyetje - shkruajnë - që duhet ta bëjnë të gjithë e duhet t’u bëhet të gjithëve, sepse nuk mund ta quajmë veten bashkësi njerëzish të thirrur, e aq më  tepër, bashkësi jete, nëse mungon pjesëmarrja  e ndonjërit a e ndonjërës”.

Ndaj të gjithë grishemi të ecim me Kishën në rrugën e sinodalitetit, me pasurinë e karizmave e të jetëve tona, pa i fshehur lodhjen, as plagët. Atëhere pjesëmarrja bëhet përgjegjësi: “Nuk mund të mungojmë, nuk mund të mos jemi ndërmjet tjerëve e me të tjerët  në përgjigjen për t’u bërë Kishë sinodale”. Sepse ëndrra misionare realizohet kur arrijmë tek të gjithë, kujdesemi për të gjithë, ndjehemi motra e vëllezër me të gjithë, ecim të gjithë së bashku në jetë e në histori, që është histori e shëlbimit!”.