Në Vatikan hapet procesi ndaj kardinalit Becciu dhe funksionarëve të tjerë të Selisë së Shenjtë
R.SH. - Vatikan
U hap sot paradite, në Sallën polifunksionale të Muzeve të Vatikanit, përgatitur për këtë rast si Sallë e Gjykatës, procesi gjyqësor i kardinalit Giovanni Angelo Becciu dhe i nëntë të pandehurve të tjerë: prelatë, funksionarë të Selisë së Shenjtë dhe drejtues të jashtëm të fondeve të Sekretarisë së Shtetit të Vatikanit, pas hetimeve që u bënë lidhur me blerjen e Pallatit të Sloane Avenue, 60, në Londër e që përfshiu, më pas, edhe çështje të tjera.
Në diskutim, krime me tituj të ndryshëm, që nisin nga shpërdorimi i detyrës zyrtare, tek përvetësimi i paligjshëm; nga korrupsioni tek zhvatja e parave. Pala e dëmtuar, Sekretaria e Shtetit.
Seanca e parë e procesit të shumëpritur, sot iu kushtua çështjeve proceduriale si dhe përcaktimit të palëve, ndërmjet të cilave, Sekretaria e Shtetit, si palë civile. Palë tjetër e dëmtuar është edhe Ior-i (Instituti i Veprave Fetare, siç quhet Banka e Vatikanit).
Përveç ish-kardinalit Becciu, ndërmjet të pandehurve të akuzuar për faje të ndryshme, janë: Mauro Carlino, Enrico Crasso, Tommaso Di Ruzza, Cecilia Marogna, Raffaelle Mincione, Nicola Squillace, Fabrizia Tirabassi, Gianluigi Torzi e René Brülhart.