Të promovohet çarmatimi gjatë pandemisë, në një webinar të Selisë së Shenjtë

R. SH. - Vatikan

Të reflektojnë mbi përpjekjet për promovimin e ndalimit global të zjarrit dhe ndalimit  të prodhimit e të përhapjes së armëve, një vit pas deklaratës së Papës Françesku dhe Sekretarit të Përgjithshëm të OKB-së, mbi temën. Ky, objektivi i ngjarjes “Advancing integral disarmament in times of pandemic” (Të shkojë përpara çarmatimi i gjithanshëm në kohën e pandimisë), që do të mbahet  online të mërkurën, 23 mars, në orën 15.00, promovuar nga Dikasteri për Shërbimin e Zhvillimit të Gjithanshëm Njerëzor dhe Komisioni Vatikanas COVID-19, në bashkëpunim me Strategic Concept for the Removal of Arms and Proliferation(SCRAP) të SOAS University of London.

Tri seanca pune online

Në webinarin, që do të mbahet në gjuhën angleze e do të mund të ndiqet në kanalin YouTube të Dikasterit, do të marrin pjesë përfaqësues fetarë dhe bashkëpunëtorë shkencorë, për t’i ofruar bashkësisë ndërkombëtare dhe liderëve fetarë - lexohet në një komunikatë të Sallës së Shtypit të Selisë së Shenjtë - mundësi konkrete për të ndjekur udhën e çarmatimit të gjithanshëm, si përgjigje që i jepet enciklikës Fratelli Tutti. Takimi do të zhvillohet në tri seanca.

E para, që do t’i kushtohet paraqitjeve institucionale, do të hapet nga kardinali Peter Turkson, prefekt i Dikasterit për Shërbimin e Zhvillimit të Gjithanshëm Njerëzor e do të pasurohet me një videomesazh të kardinalit Pietro Parolin, Sekretar i Shtetit Papnor dhe të profesor Dan Plesch, drejtor i Centre for International Studies and Diplomacy pranë SOAS University of London.

E drejta ndërkombëtare dhe dialogu fetar

E dyta, parashikuar rreth orës 16.00, do të merret me çështjen e së drejtës ndërkombëtare dhe metodave konkrete për të vijuar çarmatimin. Studiues e aktivistë të bashkësisë së çarmatimit do të shkëmbejnë përvojën e tyre, për të arritur, më pas, në përfundime, që do t’i besohen imzotit Ivan Jurkovič, Vëzhgues i Përhershëm  i Selisë së Shenjtë  pranë Kombeve të Bashkuara të Gjenevës.

Pjesa e tretë do të vërë në dukje rolin jetik që ka dialogu ekumenik ndërfetar për promovimin e paqes e të çarmatimit. Do të marrin pjesë kardinali Kurt Koch, Kryetar i Këshillit Papnor për Promovimin e Bashkimit të të Krishterëve; kardinali Miguel Ayuso Guixot, kryetar i Këshillit Papnor për Dialogun Ndërfetar; kardinali Silvano Maria Tomasi, Delegat i Posaçëm për Urdhërin Sovran të Maltës, përfaqësuesit e konfesioneve të krishtera e të feve të tjera. Mbyllja do t’i besohet imzotit Bruno Marie Duffé, Sekretar i Diskaterit për Shërbimin e Zhvillimit të Gjithanshëm Njerëzor, ndërsa Seancat do të drejtohen nga doktor Alessio Pecorario, koordinator i task forcës së Komisionit vatikanas Covid-19 për sigurimin.

Mbështetja e Kuries Romake

Kujtohet, më në fund, se ngjarja organizohet me ndihmën e institucioneve të Kuries Romake, ndërmjet të cilave, Këshillat për Dialogun Ndërfetar e për Nxitjen e Bashkimit të të Krishterëve dhe të Simpoziumit të Konferencave Ipeshkvnore të Afrikës e Madagaskarit. Japin ndihmesën për nismën edhe  Pax Christi International, Catholic Peacebuilding Network, Catholic University of America Institute for Policy Research e Berkley Center for Religion, Peace and World Affairs i Georgetown University.